Ўзбекистон соғлиқни сақлаш тизимидаги қурилишларни лойиҳалаштиришга туркиялик мутахассис раҳбарлик қилади

Ўзбекистон Соғлиқни сақлаш вазирлигининг соғлиқни сақлаш муассасаларини лойиҳалаш бўйича бош ташкилоти бўлган «Ўзтиблойиҳа» МЧЖга туркиялик тажрибали мутахассис Гурай Каймак директор этиб тайинланди. Бу ҳақда вазирлик матбуот хизмати хабар берди.

Маълумотларга кўра, 48 ёшли тажрибали меъмор саноат архитектураси мутахассислиги бўйича Туркияда бакалавр, Македонияда магистратура даражасини олган. Гурай Каймак 1993 йилда иш фаолиятини MNG Holding компаниясида бошлаган. У мазкур нуфузли ширкат машҳур Истанбул халқаро аэропортини қуришда қатнашган.

Мутахассис кейинчалик Руминияда қатор банк бинолари, Туркияда «Bayindir tib merkezi» томонидан қуриладиган тиббиёт муассасаларини лойиҳалаштиришда иштирок этган. У Тошкентдаги International Hotel Tashkent меҳмонхонаси биносини лойиҳалаштиришда ҳам фаоллик кўрсатган.

Унинг сўнгги йиллардаги лойиҳаларидан бири 2020 йилда фойдаланишга топширилган Намангандаги замонавий кутубхона биноси ҳисобланади. «Ўзтиблойиҳа» бошқарувига келган янги раҳбар зиммасига тиббиёт йўналишига оид қурилиш объектларини энг илғор андазалардан фойдаланиб лойиҳалаштириш юклатилган.

Шунингдек, у илмий-техник конструкторлик лойиҳаларини ишлаб чиқиш ва амалиётга татбиқ этиш ҳамда бу борада техник ёрдам кўрсатиш, инновацион технологиялар, илмий-техник янгиликлар ва ноу-хауларни ишлаб чиқиш каби вазифаларни бажаришга ҳам бошчилик қилади.

Бундан ташқари, эндиликда ҳудудларда маҳаллий ҳокимликлар томонидан тасдиқланаётган ҳар бир тиббиёт муассасаси лойиҳаси Гурай Каймак бошчилигидаги «Ўзтиблойиҳа» томонидан тасдиқланиши белгиланган.

Аввалроқ соғлиқни сақлаш вазири Абдуҳаким Хожибоев лавозимидан озод этилгани ва у Ўзбекистон касаба уюшмалари федерациясига ўтиши кутилаётгани тўғрисида хабар берилганди. Шу куннинг ўзида Ўзбекистон Президентининг тегишли фармони билан бош вазир ўринбосари лавозимида ишлаб келган Беҳзод Мусаев соғлиқни сақлаш вазири этиб тайинланган.