Accor ва Hyper Group Ўзбекистонда 3 та премиум меҳмонхона очади

Дунёдаги энг йирик меҳмонхона оператори Accor Hyper компаниялар гуруҳи билан Ўзбекистонда учта премиум меҳмонхона очади. Бу ҳақда компания матбуот хизмати «Дарё»га маълум қилди.

Улар мавжуд меҳмонхоналар ребрендинги ва реновациясидан сўнг Самарқандда Movenpick Samarkand, Тошкентда Swissotel Tashkent, шунингдек, Тошкент вилоятининг Навобод қишлоғида янги Swissotel Charvak номлари остида очилади.

Келгуси йилларда очилиши режалаштирилган ушбу учта меҳмонхонанинг умумий хоналари сони 500 дан ортиқ бўлиши режалаштирилган.

Ушбу учта янги лойиҳанинг имзоланиши билан биз Ўзбекистон меҳмонхона бозоридаги ўз ўрнимизни сезиларли даражада мустаҳкамлаймиз ва бу мамлакатда Швейцария иккита янги бренди — Swissotel ва Movenpick’ни жорий қиламиз, — дейди Accor New East Europe бош директори Алексис Деларофф.

Movenpick Samarkand

У тўрт юлдузли Регистон Плаза меҳмонхонасини таъмирлаш ва ребрендингидан сўнг очилади.

Етти қаватли Movenpick Samarkand меҳмонхонаси турли тоифадаги 165 та хонадан ташкил топган бўлиб, у 2022 йил охирида очилиши режалаштирилган.

Swissotel Tashkent

У беш юлдузли Miran International меҳмонхонаси таъмирланиши ва ребрендингидан сўнг очилади.

Ушбу меҳмонхона 173 та хонадан иборат бўлиб, оилавий саёҳатлар ва дўстлар билан дам олиш учун жуда мос келади.

Беш юлдузли Swissotel Tashkent 2023 йилнинг учинчи чорагида очилиши режалаштирилган.

Swissotel Charvak

У Тошкент вилояти Навобод қишлоғининг курорт ҳудудида, сунъий Чорвоқ кўли ва унинг қумли пляжи яқинида, денгиз сатҳидан 575 метр баландликда барпо этилади.

Swissotel Charvak 206 та хона ва курорт мажмуаси, фитнес маркази ва учта бассейндан иборат бўлади. Меҳмонхона инфратузилмаси, шунингдек, иккита гастрономик ресторан, бар, махсус тадбирлар учун банкет зали ва бир нечта йиғилиш хоналарини ўз ичига олади.

Swissotel Charvak’нинг очилиши 2024 йилга мўлжалланган.

Accor — дунёдаги энг йирик халқаро меҳмонхона оператори. Компания 1967 йилда ташкил этилган. 110 та мамлакатда 5300 та меҳмонхона ва 10 000 та ресторан, кафе ва барларни бирлаштиради.

Аввалроқ дунёдаги энг йирик меҳмонхона оператори Ўзбекистон бозорига киргани ҳақида хабар берилганди.