Карьера бошида иш қанчалик кам қониқиш келтирса, қирқ ёшдан кейин соғлиқ муаммолари эҳтимоли шунчалик юқори бўлади.
Сиэтлда ўтказилаётган Америка социология уюшмасининг йиллик анжуманида ўз тадқиқотлари натижаларини тақдим этган Огайо штати университети социологлари шундай хулосага келишди.
Университет матбуот хизматининг хабарига кўра, тадқиқот муаллифлари 6,5 мингга яқин америкалик фуқароларнинг соғлиги, иши ва ҳаётининг бошқа жиҳатлари ҳақидаги маълумотларни таҳлил қилишди. Бу маълумотлар 1979 йилда, иштирокчилар 14 ёшдан 22 ёшгача бўлган пайтдан бошлаб тўплана бошланган. Олимлар иштирокчиларнинг 25 ёшдан 39 ёшгача бўлган даврда ўз ишларига муносабатини кузатиб, сўнгра 40 ёшдан кейинги соғлиқларида қандай ўзгаришлар юз берганини ўрганишди.
Иштирокчиларнинг тахминан 45 фоизи ушбу давр мобайнида ўз ишларидан қониқишмаган. Атиги 15 фоиз иштирокчи бутун муддат давомида ишлашдан барқарор завқ олган.
Олимлар аниқлаганидек, ёқтирмаган иш туфайли энг кўп руҳий саломатлик зарар кўради. Карьераси бошида ўзига ёқмаган иш билан шуғулланган одамлар, севимли машғулоти билан банд бўлганларга қараганда, 40 ёшдан кейин уйқусизлик, ортиқча хавотир, тушкунлик ва ҳиссий муаммолардан кўпроқ азият чеккан.
Тадқиқот муаллифларининг таъкидлашича, яхши янгилик шундаки, 40 ёшдан кейин ўзини яхши ҳис қилиш учун ишга бўлган муносабатнинг ўзгариш йўналиши муҳим аҳамиятга эга. Агар дастлаб иш сизга ёқмаган бўлса-ю, кейинчалик уни аста-секин севиб қолсангиз, кексайганингизда руҳий саломатлигингизга ҳеч қандай салбий таъсир кўрсатмайди. Аксинча, агар йиллар давомида ишингиздан аста-секин кўнглингиз қолган бўлса, 40 ёшдан кейин уйқусизлик ва хавотирга дуч келишингиз мумкин, бироқ депрессияга тушиб қолмайсиз.
Катта ёшдаги жисмоний саломатликка келсак, таҳлил натижаларига кўра, ёқтирмаган иш унга камроқ таъсир кўрсатади. Ўз ишидан доимий равишда қониқмаган гуруҳ аъзолари ишини севадиганларга қараганда кўпроқ бел оғриғи ва шамоллашдан шикоят қилишган бўлса-да, умуман олганда соғлиқ ҳолати иккала гуруҳ аъзоларида тахминан бир хил бўлган.
Изоҳ (0)