Европа Иттифоқи Ғазодаги инсонпарварлик ёрдами ҲАМАС томонидан тўхтатилаётгани тасдиқламади. Бу ҳақда Еврокомиссия вакилига таяниб Anadolu хабар берди.
Брюсселдаги матбуот анжуманида сўзга чиққан иттифоқ вакили Ева Грнчирова Ғазодаги вазият “ҳалокатли” ва “ўта оғир” бўлиб қолаётганини таъкидлаган. Унга кўра, Европа Иттифоқининг гуманитар ҳамкорлари секторда ишлашни давом эттирмоқда. Грнчирова Исроилни гуманитар ташкилотларнинг Ғазога тўсиқсиз киришини таъминлашга чақирган.
“Бизда гуманитар ёрдамни етказиб бериш учун ишлайдиган тизим ва инфратузилма мавжуд. Инсонпарварлик ёрдами хусусийлаштирилмаслиги, сиёсийлаштирилмаслиги ёки можаро қуроли сифатида ишлатилмаслиги керак”, деди вакил.
Шу муносабат билан Европа Иттифоқи АҚШ ва Исроил кўмагида ташкил этилган Ғазо гуманитар жамғармаси (ҒГЖ) билан ҳамкорлик қилмаслигини таъкидламоқда. Исроил эса халқаро ёрдам ҲАМАС назорати остида эканини даъво қилиб келади. У 2 майдан буён АҚШ иштирокида ҒГЖ орқали норасмий ёрдам тарқатиш тизимини илгари сурмоқда. Бироқ жамғарма БМТ томонидан тан олинмаган ва фаластинлик гуруҳлар томонидан рад этилган. ҲАМАС уни “ўлим тузоғи” деб атайди.
Исроил 2 мартдан бери Ғазо сектори билан қуруқликдаги барча чегара пунктларини бутунлай ёпиб қўйган. Гуманитар ёрдам ортилган юзлаб юк машиналари эксклавга киришига йўл қўйилмаган. Керем Шалом чегара пункти орқали фақат бир нечта транспорт воситаларига рухсат берилади. Ғазога эса кунига камида 500 та ёрдам машинаси керак бўлади.
27 майдан бери гуманитар ёрдам марказларига уюштирилган ҳужумлар оқибатида ҳалок бўлганлар сони 751 нафарга етган. Яна 4 931 киши жароҳат олган.
Изоҳ (0)