АҚШ президенти Дональд Трамп 2026 йилда Оқ уй ҳудудида UFC жанги ўтказилишини маълум қилди. Бу ҳақда Fox News хабар берди.
Трамп жангнинг айнан қачон бўлиб ўтиши ва унда кимлар иштирок этиши ҳақида аниқлик киритмади.
Биз UFC жангини... Оқ уй ҳудудида ўтказамиз. У ерда катта ер бор. Биз кичик бир (жанг майдони) қурамиз — йўқ, буни Дана (UFC раҳбари Дана Уайт) қилади... Чемпионлик жанги, тўлиқ турнир, тахминан, 20–25 минг кишига мўлжалланган бўлади. Буни 250 йиллик байрам доирасида ўтказамиз, деган Трамп 2026 йилда нишонланадиган Мустақиллик куни тантаналарини назарда тутиб.
UFC президенти Дана Уайт 2024 йилги президентлик сайловларида Трампни очиқ қўллаб-қувватлаган. Трамп эса уни яқин дўсти деб билади. Сиёсатчи UFC мусобақаларига мунтазам равишда ташриф буюради. У охирги марта июнь ойида Жерси шаҳрида ўтган турнирда қатнашган эди.
Агар Трамп ҳақиқатан ҳам Оқ уйда жонли UFC жангини ўтказса, бу тарихда биринчиси бўлади. Бу унинг 2026 йилги Аmericа250 байрами доирасида президентлик анъаналарини янгилашга қаратилган саъй-ҳаракатлари рамзига айланади.
Изоҳ (0)