Эронлик 27 ёшли курашчи Навид Афкари норозилик намойишларида қатнашгани учун ўлим жазосига ҳукм этилгани ҳақида хабар берилган эди. Эрон ҳукумати 12 сентябрь куни спортчига нисбатан эълон қилинган жазони ижро этди. Бу ҳақда Fars агентлигига таяниб «ТАСС» хабар берди.
Қайд этилишича, Афкари 12 сентябрь куни эрталаб қатл этилган.
Ўтган ҳафта АҚШ президенти Дональд Трамп Теҳрон ҳукуматини Афкарига нисбатан ўлим жазосини ижро этмасликка чақирганди. Президентнинг сўзларига кўра, жангчининг барча жинояти «ҳукуматга қарши кўча намойишида қатнашишдан иборат эди».
Шу билан бирга, Эрон суди Афкарини нафақат ҳукуматга қарши митингларда қатнашишда, балки 2018 йилда Шираз шаҳрида қўриқчини ўлдиришда ҳам айбдор деб топди.
Афкари билан бирга унинг икки укаси Воҳид ва Ҳабибга ҳам суд ҳукми ўқилган. Уларнинг бири 54 йилга, иккинчиси эса 27 йилга озодликдан маҳрум этилган.
Изоҳ (0)