Давлат хавфсизлик хизмати Оҳангарон шаҳар ҳокимлигининг мансабдор ходими қамоққа олинганини маълум қилди.
Тошкент вилоятининг Оҳангарон шаҳар ҳокимлигида бўлим бошлиғи лавозимида фаолият юритувчи шахс хизмат мавқеидан фойдаланган ҳолда, 1958 йилда туғилган маҳаллий фуқаронинг ишончига кириб, ҳозирда ҳокимият балансига ўтказилиши режалаштирилаётган 3 хонали хонадонни суд тизимидаги танишлари орқали унинг номига расмийлаштириб беришини айтган.
Мазкур мансабдор шахс уйнинг нархини 15 минг АҚШ долларига келишиб ҳамда суд органларидаги танишлари учун 3500 АҚШ доллари беришини айтиб, жами 18 500 АҚШ доллари талаб қилган.
Олдиндан 9500 АҚШ доллари олган вақтида ДХХнинг Тошкент вилояти бўйича бошқармаси ва Иқтисодий жиноятларга қарши курашиш департаменти ҳудудий бошқармаси ходимлари томонидан ашёвий далиллар билан ушланган.
Ҳозирда ҳокимият вакилига нисбатан жиноят иши қўзғатилиб, қамоқ эҳтиёт чораси қўлланган.
Бундан бир кун аввал Тошкент вилоятида 3 миллион доллар кредит олиб беришни айтиб фирибгарлик қилган икки киши ушлангани маълум қилинганди. Тошкент вилоятининг Оққўрғон туманида кадастр ходими 1200 доллар пора билан қўлга тушганди.
Изоҳ (0)