Гаитида жиноий тўдалар пойтахтнинг 90 фоиз назоратини қўлга киритди. Бу ҳақда БМТ вакилига таяниб, Fox News хабар берди.
БМТ вакили 2 июль куни Гаитини “қулаш арафасида” турганини таъкидлаган. Тўдалар пойтахт Порт-о-Пренснинг тахминан 90 фоизини назорат қилмоқда. Бу ҳақда БМТ Гиёҳванд моддалар ва жиноятчилик бўйича бошқармаси ижрочи директори Гада Фати Вали Хавфсизлик кенгашига маълум қилган. У ушбу тўдалар янада кенг ҳудудларни эгаллаб олаётганидан огоҳлантирган.
“Яқин вақтгача зўравонликдан ҳоли бўлган Гаити жанубида тўдалар билан боғлиқ ҳодисалар сони кескин ошди. Шарқда эса жиноий гуруҳлар қуруқликдаги йўллардан, жумладан Белладере ва Малпассе каби муҳим ўтиш жойларидан фойдаланмоқда. У ерда полиция ва божхона ходимларига ҳужумлар ҳақида хабар берилган”, деди Вали.
БМТ бош котиби ёрдамчиси Мирослав Женканинг маълум қилишича, “Порт-о-Пренсда давом этаётган тўдалар қуршови” ва уларнинг мамлакатдаги мустаҳкамланган таянчи “вазиятни жар ёқасига яқинлаштирмоқда”.
Тўдалар 2021 йил июль ойида президент Жовенел Моиз ўлдирилганидан кейин ҳокимиятни қўлга киритганди. Илгари улар пойтахтнинг 85 фоизини назорат қилган. Юқоридаги суиқасддан кейин Гаитида президент сайланмаган.
“Ҳудудий назоратнинг кенгайиши тўдаларга қўшимча даромад манбалари ва музокаралар учун имконият беради. Бироқ бу ҳужумлар ўз мақсадлари учун сиёсий ҳолатни беқарорлаштиришга уринаётган шахслар томонидан ҳам қўллаб-қувватланмоқда”, дейилади БМТ экспертлари ҳисоботида.
АҚШ Давлат департаменти 2024 йил сентябрь ойида Гаитига саёҳат қилиш бўйича расмий хабарнома билан чиққан. Унда америкаликлар одам ўғирлаш, жиноятчилик, фуқаролик тартибсизликлари ва чекланган соғлиқни сақлаш туфайли мамлакатга ташриф буюришдан қайтарилганди.
Май ойида Трамп маъмурияти Гаитининг энг қудратли икки тўда тармоғи — “Вив Ансанм” ва “Гран Гриф”ни хорижий “террорчилик ташкилотлари” ва махсус тайинланган “глобал террорчилар” деб эълон қилган.
Изоҳ (0)