Доминикан президенти Луис Абинадер Гаити билан чегарада девор қурмоқчи. Ўз режаси ҳақида у конгрессга мурожаатида маълум қилди. Бу ҳақда Diario Libre хабар берди.
Унинг сўзларига кўра, 2021 йилнинг иккинчи ярмида мамлакат қўшни давлат билан чегарада хавфсизлик чораларини кучайтиради. Улар «физикавий ва технологик воситалар», шу жумладан, икки қаватли девор, ҳаракат датчиклари, юзни аниқлаш тизимлари, радарлар ва инфрақизил нурланиш тизимларини ўз ичига олади.
Девор ёрдамида давлат раҳбари ноқонуний миграция, гиёҳванд моддалар савдоси ва олиб қочилган автомашиналарни сотиш муаммосига барҳам берилишига умид қилмоқда.
АҚШнинг собиқ президенти Дональд Трампнинг сайловолди кампаниясидаги ваъдаларидан бири Мексика билан чегарада узунлиги 1,6 минг километрга яқин девор қуриш эди. Бироқ у ишни охирига етказа олмади. Трамп девор қурилиши харажатларини Мексикага тўлатишга ваъда берганди. Мексиканинг буни рад этиши охир-оқибат давлат раҳбарининг маблағ ажратишдан бош тортган конгрессдаги демократлар билан зиддиятига олиб келди. Президент режалаштирилган маблағнинг атиги 20 фоизини конгресс томонидан мудофаа учун ажратилган харажатларни қайта тақсимлаш ёрдамида қўлга киритишга муваффақ бўлди. АҚШнинг амалдаги президенти Жо Байден ўзининг инаугурациясидан сўнг Мексика билан чегарада девор қурилишини тўхтатди.
Изоҳ (0)