АҚШ ҳукумати Гаитига хавфсизлик ва полиция тизимларини қайта тиклаш учун 100 миллион доллар ажратилишини эълон қилган. Бу ҳақда АҚШ президенти идораси тарқатган хабарга таяниб, Reuters маълум қилди.
АҚШ Давлат департаменти молиявий ёрдамни тасдиқлаган. Ушбу қарордан мақсад Гаитида фуқаровий тартибни қайта йўлга қўйиш экани маълум қилинган.
“Зўравон тўдалар томонидан содир этилган қонунбузарликлар туфайли Гаитидаги хавфсизлик вазияти ўта даражада ёмонлашган. Гаити халқи тартиб ўрнатилишини энди ортиқ кута олмайди”, — деган АҚШ бош котиби Энтони Блинкен Кариб денгизи мамлакатидаги вазиятга муносабат билдириб.
Манбада айтилишича, янги пакетнинг 95 миллиард доллари хавфсизлик миссиясини қўллаб-қувватлаш учун ажратилади. Яна 15 миллион доллар эса Гаити полициясини тўлиқ таркибда қайта ташкил этиш учун сарфланади.
Жорий йилнинг март ойи охирида АҚШ Конгресси талаби билан Гаитига молиявий ёрдам ажратиш қисқа муддатга тўхтатиб қўйилган эди. Молиявий маблағ талаб этувчи “асосли ҳолатлар” кўринмагунча ҳеч қандай ўтказмалар бўлмаслиги айтилган.
Гаитида сўнгги бир ой давомида зўравонликлар даражаси ниҳоятда ошиб кетган. Пойтахт Порт-о-Пренснинг кўплаб туманлари талончилар назоратига ўтган. Кескинликлар бошланганидан бери 300 мингга яқин аҳоли пойтахтни ташлаб чиққани хабар қилинган.
Изоҳ (0)