Гаити қирғоқлари яқинида 19 июль куни муҳожирлар қайиғи ёниб кетиши оқибатида унда бўлган 40 киши ҳалок бўлган. Бу ҳақда CNN нашри хабар берди.
Воқеа ҳақида дастлаб Халқаро миграция ташкилоти хабар тарқатган. Гаитидаги ҳукумат манбалари ҳам кейинроқ хабарни тасдиқлаган.
Қайиқ жума куни кечки пайт соҳил кузатув гуруҳлари томонидан аниқланган. Қайиқ ичида ёнғин бўлаётганини пайқаган назоратчилар зудлик билан қутқарув гуруҳларини чақирган.
Манбада айтилишича, кема чоршанба куни 80 дан ортиқ муҳожирни олиб Гаити портини тарк этган. Муҳожирлар Туркс ва Кайкос ороллари томон кетаётган бўлган.
Ёнғин оқибатида ҳалок бўлган 40 кишининг жасади қайиқдан чиқариб олинган. Яна 41 киши воқеадан омон қолиб, муҳожирларни назорат қилиш бўлимига олиб кетилган.
Халқаро миграция ташкилотининг Гаитидаги миссияси раҳбари Грегуар Гудштейн баёнот эълон қилиб, фожиада Гаити расмийларини айблаган. Уларни мамлакатдаги хавфсизлик инқирозини ҳал эта олмагани ва миграция учун қонуний йўллар ташкил эта олмагани учун қоралаган.
“Гаитининг ижтимоий-иқтисодий аҳволи оғир. Ўтган ойлардаги ҳаддан ташқари зўравонликлар гаитиликларни омон қолиш учун янги чоралар кўришга мажбур қилди”, деган Грегуар Гудштейн.
Изоҳ (0)