Гаитида 14 август куни юз берган зилзила туфайли ҳалок бўлганлар сони 2248 кишига етди. Бу ҳақда республика фуқаро муҳофазаси бошқармасига таяниб, EADaily хабар берди.
Бундан аввал қурбонлар сони 2 207 кишига етгани маълум қилинганди. Бошқарма маълумотларига кўра, 12 763 киши жароҳатланган, 329 киши бедарак йўқолган. Табиий офат оқибатида минтақадаги 53 мингдан зиёд бино бутунлай, 83 мингдан ортиғи қисман вайрон бўлган.
Шунингдек, зилзиладан кейин Гаити қирғоқларига «Грэйс» тропик бўрони урилган. Унинг оқибатида қидирув-қутқарув ишлари вақтинча тўхтатилган. Бўрон мамлакатнинг жануби-ғарбий қисмига — зилзиладан энг кўп зарар кўрган ҳудудларга таъсир қилган.
Гаитида 14 август, шанба куни 7,2 магнитудали зилзила юз берганди. Унинг кетидан бирма-бир афтершоклар, хусусан, 5,2 магнитудали такрорий ерости силкинишлари кузатилган. Зилзила эпицентри пойтахт Порт-о-Пренсдан 125 километр ғарбда жойлашган. Гаити бош вазири Ариэл Анри мамлакатда бир ойлик фавқулодда ҳолат эълон қилди.
Аввалроқ қурбонлар сони 1297 кишига, кейинроқ 1419 кишига етгани, уларнинг сони яна ошиши мумкинлиги ҳақида хабар қилинганди.
Изоҳ (0)