Гаити собиқ президенти Жовенел Моиз ўлдирилганига бир йил тўлган бўлса-да, АҚШ Давлат департаменти ушбу иш бўйича терговда ҳеч қандай ривожланиш йўқлигидан ташвишда эканини билдирди.
«Биз Гаитида ушбу қотиллик бўйича терговдаги чекланган ютуқлардан хавотирдамиз’’, — деди АҚШ давлат котиби Энтони Блинкен департамент томонидан эълон қилинган баёнотда.
Унинг таъкидлашича, аллақачон бешинчи судья тайинланган, ‘‘Гаити ҳукумати эса ишда иштирок этаётган судьяларни ҳимоя қилиш ва асосий далилларни сақлаш учун хавфсизлик чораларини кучайтириш бўйича суд тизимининг чақирувларига тўғри жавоб бермаган».
Блинкен Гаити ҳукуматини Моизнинг ўлдирилиши бўйича «мустақил ва пухта тергов»ни давом эттиришга ва айбдорларни жавобгарликка тортишга чақирди.
«Умид қиламизки, Гаити ҳукумати ва тегишли халқаро ҳамкорларнинг биргаликдаги саъй-ҳаракатлари яқин орада ушбу жиноятга ойдинлик киритади, шунда адолат қарор топади ва Гаити халқи президент Моизнинг ўлдирилиши жазосиз қолмаганини ишонч билан айта олади», — деди давлат котиби.
Гаити президенти 2021 йил 7 июлга ўтар кечаси ўз қароргоҳида ўлдирилган ва унинг рафиқаси оғир яраланган эди. Суиқасдда ёлланма аскарлар гуруҳи иштирок этган, жумладан, гуруҳда паспортлари бўйича 26 нафар колумбиялик ва Гаитида яшовчи икки америкалик бўлгани аниқланган.
Мавзуга доир:
Изоҳ (0)