Гаитидаги вазият кескинлашган бир пайтда аксар элчилар ҳамда бошқа европалик дипломатлар мазкур давлатни тарк этмоқда. Бу ҳақда Deutsche Welle хабар берди.
Қайд этилишича, 10 март куни Гаитидаги ўта хавфли вазият туфайли Европа Иттифоқи делегацияси аъзолари Доминикан Республикасига жўнаб кетган. Баёнотда кейинги огоҳлантиришгача европалик дипломатлар ўша ердан ишлаши айтилган.
Аввалроқ АҚШ Порт-о-Пренсдаги элчихона ходимларининг бир қисмини олиб кетганини айтган эди. Шу билан бирга, элчихона биносини ҳимоя қилиш чоралари кучайтирилган. Давлат департаментига кўра, АҚШнинг Гаитидаги элчихонаси фаолияти чекланган, аммо ҳозирча очиқ қолмоқда.
Сўнгги кунларда Гаитида қуролли тўдалар томонидан полиция участкалари, қамоқхоналар ва суд биноларига қатор ҳужумлар уюштирилган. ОАВ маълумотларига кўра, ҳозирда тўдалар Гаитидаги пойтахтнинг катта қисмини, шунингдек, мамлакатнинг қолган қисмидаги транспорт алоқаларини назорат қилмоқда. Зўравонликлар авж олгани сабабли Гаитидаги иккала халқаро аэропорт ҳам ёпилган.
Гаитидаги ҳукумат ва инфратузилма объектларига босқинчилар ҳужумлари март ойи бошидан бери давом этмоқда. Мамлакатда фавқулодда ҳолат ва комендантлик соати жорий этилган. 9 март куни қуролланган гуруҳлар пойтахт Порт-о-Пренсдаги ҳукумат бинолари, полиция идоралари, Ички ишлар вазирлиги ва президент саройига ҳужум қилган.
Вазиятнинг кескинлашиши Гаити бош вазири вазифасини бажарувчи Aриэль Анрининг Кенияга ташрифи чоғида содир бўлган. Порт-о-Пренс яқинидаги отишмалар туфайли Анри Гаитига қайтиб кела олмаган.
Гаитида тартибсизликларнинг бошланишига Анрининг Кариб ҳавзаси етакчилари йиғилишида 2025 йил ўрталарида умумий сайловлар ўтказиш ҳақидаги келишуви сабаб бўлган. G9 ва Оила гуруҳига раҳбарлик қилувчи собиқ полициячи Жимми Шеризье бошчилигидаги Гаити бандитлари қарорни танқид қилиб, бош вазир истеъфога чиқмаса, фуқаролар уруши билан таҳдид қилган.
Ҳозирда Гаитида президент ҳам, парламент ҳам мавжуд эмас.
Изоҳ (0)