Гаити бош вазири Ариэль Анри пойтахт Порт-о-Пренс прокурори Бед-Фор Клодни лавозимидан четлатиш тўғрисидаги буйруқни имзолади. Бундан аввал прокурор республика президенти Жовенел Моизнинг ўлдирилиши юзасидан бош вазирни жавобгарликка тортишни талаб қилганди.
«Сизга Порт-о-Пренснинг ҳукумат комиссари лавозимини тугатишингиз тўғрисида қарор қабул қилинганини етказиб қўйиш шарафига муяссар бўлдим. Қарор ушбу мактубни олганингиздан сўнг кучга киради», — дейилади ҳужжатда.
Хабарга кўра, бош вазир Франц Луи Жюстни прокурор этиб тайинлаган.
Гаити прокуратураси бош вазир Ариэль Анрига президентни ўлдиришда айбланувчи мақомини беришни талаб қилганди. Прокурор Бед-Фор Клод, шунингдек, терговдан Анрининг мамлакатни тарк этишини тақиқлашни сўраган.
Прокурорни ишдан бўшатиш ҳақидаги буйруқ ҳақиқийми ёки йўқ, номаълумлигича қолмоқда, чунки 1987 йилги Гаити конституциясида прокурор фақат президент томонидан тайинланиши ёки лавозимидан озод этилиши мумкинлиги кўрсатилган. Ўз навбатида, Гаити бош вазири ҳам фақат президентнинг рухсати билан қонуний равишда сўроқ қилиниши мумкин.
Эслатиб ўтамиз, Гаити президенти Жовенел Моиз 7 июлга ўтар кечаси қуролли ҳужумчилар томонидан ўз қароргоҳида отиб ўлдирилган. Ҳодисада президентнинг рафиқаси ҳам оғир жароҳат олган, аммо у АҚШга олиб кетилиб, тиббий ёрдам билан ҳаёти сақлаб қолинган. Мамлакат бош вазири вазифасини вақтинчалик бажарувчи Клод Жозефнинг айтишича, ҳужум қилганлар инглиз ва испан тилларида сўзлашган. Гаити овоз бериш ва партиялараро алоқа ишлари вазири Матиас Пьернинг таъкидлашича, Моизнинг ўлдирилиши 26 кишидан иборат тўда томонидан уюштирилган. Улардан тўрт нафари отиб ташланган.
Изоҳ (0)