Гаити президенти ўлдирилиши олдидан қийноққа солингани маълум бўлди. АҚШ сиёсий инқирозни тартибга солиш учун Гаитига ўз делегациясини юборади

Гаити президенти Жовенел Моизга ҳужум қилганлар уни ўлдиришдан аввал қийноққа солган. Бу ҳақда мамлакат бош вазири вазифасини бажарувчи Клод Жозеф ABC News каналига берган интервьюсида маълум қилди, деб ёзади Meduza.

«Ёлланма аскарлар президент қароргоҳига келиб, уни қийнаган ва ўлдирган», — деди Жозеф ва ҳужумнинг 20 га яқин иштирокчиси қўлга олинганини, энди улар жавобгарликка тортилишини қўшимча қилди. «Адолатга эришишимизга қаттиқ ишонамиз», — деди у Гаити ҳукумати қотилликнинг фош қилинишини ўзининг бирламчи вазифаси деб ҳисоблашини қўшиб қўйди.

10 июль куни Моизнинг бевасига тегишли расмий Twitter’да президентнинг ўлимидан кейинги биринчи аудиохабар пайдо бўлди. Haiti24’нинг ёзишича, Мартин Моиз унинг турмуш ўртоғи лойиҳалари амалга оширилишига йўл қўймаслик мақсадида ёлланма қотиллар томонидан ўлдирилган. Шу билан бирга, беванинг сўзларига кўра, президентнинг қотиллари «унинг бирорта сўз ҳам айтишига йўл қўймаган». Жозеф BC News’га берган интервьюсида Мартин Моизнинг аудиомурожаати ҳақиқий эканини тасдиқлади.

Айни пайтда Гаитининг маҳаллий Juno7 нашри хабарига кўра, президентнинг ўлдирилиши фонида юзага келган сиёсий инқирозни тартибга солиш учун АҚШ Гаитига ўзининг катта делегациясини юборади.

Делегация иштирокчилари орасида президентнинг ғарбий яримшар бўйича махсус ёрдамчиси Хуан Гонсалес ва давлат котибининг ғарбий яримшар масалалари бўйича ёрдамчиси вазифасини бажарувчи Лаура Лохман бор. Улар бош вазир вазифасини бажарувчи Клод Жозеф, ўзини бош вазир деб ҳисобловчи Ариэл Генри ҳамда сенат томонидан муваққат президент деб эълон қилинган Жозеф Ламбер билан учрашади.

Жовенел Моиз Гаити пойтахти Порт-о-Пренсдаги қароргоҳида 7 июлга ўтар кечаси ўлдирилди. Унинг рафиқаси ўқотар қуролдан яраланиб, дастлаб маҳаллий касалхонага етказилди, сўнг даволаниш учун АҚШга юборилди.

Гаити ҳукумати президентни ўлдиришда гумонланиб, 15 нафар колумбиялик ва икки нафар америкалик қўлга олинганини маълум қилди. Яна икки гумонланувчи (улар ҳам Колумбия фуқаролари) полициячилар билан отишмада ўлдирилди. Суиқасднинг иштирокчилари деб тахмин этилаётган яна бир неча киши қочиб кетишга муваффақ бўлди.

Президентнинг ўлдирилиши муносабати билан Гаити ҳукумати АҚШга мурожаат қилиб, мамлакатга инфратузилманинг жуда муҳим объектларини ҳимоя қилиш учун чекланган қўшинлар контингентини юборишни сўради.