Гаити бош вазири Жак Ги Лафонтаннинг кортежи 24 апрель, душанба куни икки ўсмирни уриб кетди, улардан бири касалхонага кетишда вафот этди, деб ёзади «ТАСС».
Ҳодиса мамлакат жануби-ғарбидаги Ле-Ке шаҳрида юз берди. Associated Press маълумотларига кўра, ўсмир болалар мотоциклда кетаётганди. Жароҳатланган йигитчани вертолётда мамлакат пойтахти Порт-о-Пренсга етказишди.
Ҳалокатга нима сабаб бўлгани номаълум. Ҳукумат автомобиллари жуда юқори тезликда ҳаракатланган бўлиши истисно қилинмаяпти.
Йўл-транспорт ҳодисасидан сўнг кортеж тўхтамади. Бу маҳаллий аҳоли ғазабига сабаб бўлди, норозилик белгиси сифатида улар автомобиль шиналарини ёқиб юбора бошлади.
Лафонтан Гаити жануби-ғарбига у ерда ўтган дам олиш кунлари содир бўлган жала оқибатида сув остида қолган туманларни кўриш учун борган. Сув тошқинида камида тўрт киши қурбон бўлган.
Изоҳ (0)