Ўзбекистонда пенсияга чиқиш ёшини босқичма-босқич ошириш лозим. Бу ҳақда Халқаро валюта жамғармаси миссиясининг мамлакатга ташрифи якунлари бўйича хулосасида келтирилган.
Жамғарма таҳлилида Ўзбекистон пенсия тизими қатор ислоҳотларга муҳтожлиги қайд этилган. Шу сабаб тизим ўрта муддатли барқарорликни таъминлай олиши учун айрим ўзгаришларни амалга ошириш зарур. Жумладан, қуйидаги чораларни қўллаш муҳим:
- пенсияга чиқиш ёшини босқичма-босқич ошириш;
- автоматик нарх индексациясини жорий қилиш (яъни инфляцияга қараб пенсияни автоматик ошириш);
- пенсия нафақаси миқдорини меҳнат фаолияти давомидаги ўртача даромад асосида ҳисоблаш;
- айрим ташкилотлар учун белгиланган имтиёзли бадал ставкаларини босқичма-босқич бекор қилиш билан бир вақтда стандарт бадал ставкасини ошириш.
Жамғармага кўра, кексаликда камбағалликни камайтириш мақсадида бериладиган ҳар қандай ижтимоий нафақалар қатъий манзилли бўлиши лозим. Булар эҳтиёжмандликни баҳолаш асосида аниқланиб, давлат бюджетидан молиялаштирилиши ва такрорланишларнинг олдини олиш учун бошқа ижтимоий қўллаб-қувватлаш чоралари билан узвий боғлиқ ҳолда бошқарилиши керак.
Аввалроқ Ўзбекистонда пенсия олувчилар сони 4,2 млн нафарга етгани хабар қилинганди. Бу аҳолининг 11 фоиздан ортиғини ташкил этади. Лекин бу рақам республикадаги жами пенсионерлар сонини ифодаламайди. “Дарё” манбасининг маълум қилишича, ҳуқуқни муҳофаза қилувчи органлар тузилмаларидан пенсияга чиққанлар ҳисоби ва тўловлари алоҳида юритилади. У ташкилотлар қуйидагилар:
- Президент давлат хавфсизлик хизмати;
- Давлат хавфсизлик хизмати;
- Мудофаа вазирлиги;
- Ички ишлар вазирлиги;
- Бош прокуратураси;
- Фавқулодда вазиятлар вазирлиги;
- Миллий гвардияси;
- Божхона қўмитаси;
- Конституциявий суд;
- Олий суд;
- Судьялар олий кенгаши.
Мазкур ташкилотларда ишлаб, пенсияга чиққан ва ҳозир пул олаётган пенсионерлар сони тўлиқ очиқламаган.
Изоҳ (0)