Наманган вилоятининг Чортоқ тумани ҳокими иккинчи маротаба турмушга чиққан ўринбосарига 100 миллион сўм миқдорида мукофот пули тўлаб бергани хабар берилганди. Ҳокимлик ахборот хизмати буни рад этди.
“Дарё” журналисти билан суҳбатлашган ҳокимлик масъули Расулбек Умматовнинг маълумот беришича, турмушга чиққани айтилаётган ўринбосарнинг ёши 53 да бўлиб, айни кунда набирали аёл ҳисобланади.
Бу хабардан нафақат опанинг ўзи, ҳаммамиз шокдамиз. Қандай қилиб, бундай ёлғон ахборот тарқатиш мумкин. Опанинг ўзи менга Telegram дан ёзиб, тавба деяпти. Айнан пенсия ёшига етган аёлни, қўни-қўшнилари, набиралари олдида бундай обрўсизлантириш кимга керак экан?, — дейди туман ҳокимининг матбуот котиби Расулбек Умматов.
Ҳокимлик ахборот хизмати раҳбарининг қўшимча қилишича, айни кунда туманда ҳокимлик лавозими ҳам вакант лавозимлардан бири бўлиб турибди.
Туман ҳокимининг лавозими ўзгаргач, айни кунда туманда мукофот тўлаб берувчи ҳоким ҳам йўқ, — дейди у.
Аввалроқ Чортоқ тумани ҳокими Анвар Отахўжаев Наманган шаҳар ҳокими этиб тайинлангани хабар берилганди.
Изоҳ (0)