Қашқадарёда вилоят “Ислоҳотлар штаби” тузилиши белгиланди. Бу ҳақда 20 июнь куни Қашқадарёни комплекс ривожлантиришнинг устувор вазифаларига бағишланган йиғилишда маълум қилинди.
“Вилоятдаги ўзгаришларни кўриб, одамлар билан гаплашиб, ислоҳотларимиз уларнинг ҳаётига шиддат билан кириб бораётганига яна бир бор амин бўлдим. Олдинлари битта вилоятдаги ўзгаришлар билан танишишга бир кун етарди. Шу кунларга етиб келдик, ҳозир битта туманга бир ҳафта ҳам кам”, деди йиғилишга раислик қилган Шавкат Мирзиёев.
Унинг таъкидлашича, 8 йил аввал вилоят саноатининг ярмидан кўпи нефть-газ ва кимё тармоғи корхоналарига тўғри келган, ўтган даврда электротехника, қурилиш материаллари, тўқимачилик, мебелчилик соҳаларида катта сакраш бўлиб, ҳозирда бу тармоқларнинг саноатдаги улуши 54 фоизни ташкил этмоқда. Лекин қилинган ишлар билан чекланмасдан, янада юқори суръат билан ишлаш лозимлиги кўрсатиб ўтилди.
Президент жорий ҳафта бошида ҳокимларга юқоридан топшириқ кутмасдан, ўзи ташаббус қилиб, проактив ишлашга ўтиш бўйича аниқ вазифаларни белгилаб берганини эслатди. Қашқадарёда ҳали ишга солинмаган камида 15 миллиард долларлик салоҳият бор. Бу имкониятларнинг камида учдан бири лойиҳага айлантирилса, вилоятнинг ялпи ҳудудий маҳсулотини келгуси беш йилда бемалол 10 миллиард доллардан ошириш мумкинлиги таъкидланди.
Шу муносабат билан Қашқадарёда вилоят “Ислоҳотлар штаби” тузилиши белгиланди.
Шавкат Мирзиёевнинг Қашқадарёга ташрифи биринчи куни
Шавкат Мирзиёев Қашқадарёга ҳудудлар ривожи, ислоҳотлар натижадорлиги билан танишиш мақсадида келганди. 19 июндаги ташрифини Қарши шаҳридаги “Алп техно сервис” электротехника корхонаси билан танишувдан бошлади. Қарши шаҳридан Шаҳрисабзга поездда борди ва у ерда кўп тармоқли кардиология маркази фаолияти билан танишди. Яккабоғ туманида барпо этилган “Янги Ўзбекистон” массивини бориб кўрди. Шаҳрисабз тумани Ҳисор тоғи ён бағридаги сайёҳлик салоҳияти билан танишди. “Мираки” халқаро туризм марказига ташриф буюрди. “Ҳисорак”да 1,5 миллион долларга қурилган кичик ГЭСни кўздан кечирди. Шаҳрисабз туманидаги агротуризм мажмуасини бориб кўрди.
Изоҳ (0)