Yoz kelishi bilan quyoshdan himoyalovchi ko‘zoynakka ehtiyoj yanada ortadi. Ammo o‘zimizga ko‘zoynak xarid qilish uchun do‘konga borganimizda, darhol tanlov qiyinchiligiga duch kelamiz: vitrinada shakli, materiali, linzalarning rangi va ultrabinafsha nurlardan himoya darajasi bilan farq qiladigan ko‘plab modellar bor. Baʼzida nafaqat chiroyli ko‘rinadigan, balki sog‘liqni ham samarali himoya qiladigan ko‘zoynakni tanlash juda mushkul. Shuning uchun biz bu masalani chuqurroq o‘rganishga qaror qildik.
Haddan tashqari qora ko‘zoynak — noto‘g‘ri tanlov
Agar qora ko‘zoynak sotib olsangiz, sayr paytida har safar kafega yangi limonad ichish uchun kirganingizda ularni yechishga majbur bo‘lasiz. Kuchli qoraytirilgan linzalar xonalar uchun mo‘ljallanmagan: binoda bunday ko‘zoynak taqish ko‘zning charchashi, bosh og‘rig‘i, ko‘rishning xiralashuvi va yorug‘likka sezuvchanlikning ortishiga olib kelishi mumkin.
Umuman olganda, har qanday qora ko‘zoynakni xona ichida va tunda taqish tavsiya etilmaydi: bu ko‘rish qobiliyatining yomonlashishiga sabab bo‘lishi mumkin. Bundan tashqari, haydovchilar shuni bilishlari kerakki, rul boshqarayotganda juda qora ko‘zoynak taqish mumkin emas. Baʼzi mamlakatlarda buning uchun jarima ham solinishi mumkin.
Mos gardish (oprava) — bu moda haqida emas, balki salomatlik haqida
Hamma joyda ko‘zoynak sizga yarashsa, uni taqish kerakligi aytiladi. Baʼzan hatto bu mavsumda qanday ramkalar urf ekanligini ham maʼlum qilishadi. Biroq, eng muhimi, ko‘zoynak yuzingizga mos kelishiga eʼtibor qaratish lozim, aks holda ko‘zlaringiz zarar ko‘radi. Gardish kichkina bo‘lmasligi, burundan sirg‘alib tushmasligi va ko‘zlaringizni imkon qadar yaxshi himoya qilishiga ahamiyat bering. Ultrabinafsha nurlar hatto ko‘zoynak linzalari orqali ham o‘tishi mumkin, ammo aksessuar to‘g‘ri tanlangan bo‘lsa — tushib ketmasa va ko‘zlarga yetarlicha yaqin joylashgan bo‘lsa — ultrabinafsha nurlanishning salbiy taʼsiri kamayadi.
Qizil linzali ko‘zoynak
Quyosh ko‘zoynagi ishlab chiqaruvchilari bizga gardishlarning keng tanlovini taqdim etmoqda, masalan, rangli linzali nusxalari ham bor. Ammo shuni yodda tutish kerakki, qizil ko‘zoynak chiroyli bo‘lsa-da, xavflidir. Qizil linzalarda ultrabinafsha nurlarni yutish qobiliyati eng past bo‘lib, ular ko‘zni samarali himoya qila olmaydi. Eng yomoni, ular katarakta kasalligini keltirib chiqarishi mumkin. Bunday ko‘zoynak bilan mashina haydash ham tavsiya etilmaydi: linzalarning qizil rangi yo‘ldagi belgilarni idrok etishni o‘zgartiradi. Baʼzi hollarda bu hatto xavfli vaziyatga olib kelishi mumkin.
Umuman olganda, rangli linzalar haqida nima deyish mumkin?
Qizil ko‘zoynak haqida hamma narsani aniqlagan ekanmiz, boshqa ranglarni ham tilga olib o‘tishimiz mumkin. Masalan, yashil ko‘zoynak ko‘k nurni filtrlaydi va golf yoki tennis kabi tabiat qo‘ynidagi sport turlari uchun juda mos keladi. Sariq ko‘zoynak ham sportchilar uchun qulay bo‘lib, uni hatto binoning ichida ham taqish mumkin.
Kulrang linzalar yaltiroqlikni kamaytiradi, ayniqsa, suvda. Shu sababli baliqchilar va kemachilarga bu ajoyib tanlov hisoblanadi. Ko‘k va binafsha rangli ko‘zoynaklar esa narsalarning chegaralarini aniqroq ko‘rsatadi. Shuning uchun tumanli ob-havoda juda qo‘l keladi.
Gradientli ko‘zoynaklar — ajoyib tanlov
Bu ko‘zoynak uslubining o‘ziga xos linzalari bor. Yuqori qismi to‘qroq rangda bo‘lib, ko‘zni quyosh nuri va nurlanishdan himoya qiladi, pastki qismi esa ochroq, bu esa yaqin narsalarga, masalan, kitob sahifalariga yoki avtomobil asboblar paneliga diqqatni yaxshiroq jamlash imkonini beradi. Ularning qulayligi aynan ikki vazifani bajarishidadir. Yorug‘ quyoshda ham, qorong‘i xonada ham ultrabinafsha nurlaridan himoyalangan holda hamma narsani ko‘ra olasiz.
Polarizatsiyalangan ko‘zoynaklar — yulduzchali tanlov
Butun linzaga qo‘llanadigan noyob kimyoviy tarkib tufayli bu ko‘zoynaklar quyosh nurining katta qismini to‘sadi va qaytaradi. Shuni eʼtiborga olish kerakki, polarizatsiya quyosh nuri bilan juda samarali ishlaydi, lekin ultrabinafsha nurlanishga nisbatan emas. Ko‘zlaringizni maksimal darajada himoya qila oladigan modellar mavjud, ammo xarid qilishda maʼlum bir model buni uddalay olishini aniqlashtirish kerak. Polarizatsiyaning o‘zi hech narsani kafolatlamaydi.
Gardishning materiali ham muhim ahamiyatga ega
Qoplama materiali salomatlikka faqat bilvosita taʼsir ko‘rsatsada, to‘g‘ri tanlangan sifatli qoplamali ko‘zoynak uzoq vaqt xizmat qiladi. Po‘lat gardishlar yeyilishga chidamli, zanglamaydi va hatto allergiyaga moyil teri uchun ham mos keladi. Biroq kamchiliklari ham bor — ular kamroq egiluvchan, bu esa kiyish qulayligiga taʼsir qilishi mumkin, shuningdek, boshqa metall gardishlarga qaraganda og‘irroq. Alyuminiy gardishlar juda yengil va shaxsiy o‘lchamga muammosiz moslashadi. Ammo ular qizib ketadi, bu esa issiq kunlarda noqulaylik tug‘dirishi mumkin.
Plastik gardishlar narxi arzonroq bo‘lib, istalgan shakl va rangni tanlash imkonini beradi. Biroq ular kamroq xizmat qiladi: vaqt o‘tishi bilan sinishi va rangi o‘chishi mumkin. Asetat gardish metallga allergiyasi borlar uchun ajoyib tanlov hisoblanadi. Bunday gardishlar juda mustahkam va egiluvchan, lekin oddiy plastmassaga qaraganda qimmatroq va og‘irroq bo‘ladi.
Izoh (0)