Қозоғистоннинг Оқмўла вилоятида яшин уриши оқибатида 37 ёшли эркак ва унинг 9 яшар ўғли ҳалок бўлди. Бу ҳақда “Казинформ” хабар берди.
Ҳодиса 1 июнь куни Акадир қишлоғи яқинида содир бўлган. Ота ва ўғил чорва молларини боқаётган бўлган. Улар яшин уриши оқибатида воқеа жойида ҳалок бўлган. Ўлим ҳолати бўйича жиноий иш қўзғатилган.
Фожиали ҳодиса тафсилотларини аниқлаш бўйича тадбирлар ўтказилмоқда. Текширув натижалари бўйича якуний процессуал қарор қабул қилинади, дейди вилоят полиция департаменти.
2024 йилнинг август ойида ҳам Қозоғистоннинг Оқтўбе шаҳрида бир эркак яшин уриши оқибатида ҳалок бўлганди. Эркак кечки овқатдан сўнг ҳовлига чиққан ва уни яшин урган. Тиббиёт ходимлари эркакнинг ҳаётини қутқара олмаган.
Ўша йилнинг июль ойида эса Атров вилоятида 35 ёшли Ўзбекистон фуқароси яшин уриши оқибатида ҳалок бўлганди. Эгасиз уйни яшин уриши натижасида ёнғин келиб чиққан. Ёнғинни ўчириш учун уч киши ва битта техникадан иборат ўт ўчириш бригадаси жалб қилинган. Кейинчалик уйда одам борлиги аниқланган. Марҳум 35 ёшли Ўзбекистон фуқароси 28 май куни Қозоғистонга келган ва Мияли қишлоғида яшовчи фуқаронинг уйида вақтинча рўйхатга олинган.
Изоҳ (0)