Qozog‘istonning Oqmo‘la viloyatida yashin urishi oqibatida 37 yoshli erkak va uning 9 yashar o‘g‘li halok bo‘ldi. Bu haqda “Kazinform” xabar berdi.
Hodisa 1-iyun kuni Akadir qishlog‘i yaqinida sodir bo‘lgan. Ota va o‘g‘il chorva mollarini boqayotgan bo‘lgan. Ular yashin urishi oqibatida voqea joyida halok bo‘lgan. O‘lim holati bo‘yicha jinoiy ish qo‘zg‘atilgan.
Fojiali hodisa tafsilotlarini aniqlash bo‘yicha tadbirlar o‘tkazilmoqda. Tekshiruv natijalari bo‘yicha yakuniy protsessual qaror qabul qilinadi, deydi viloyat politsiya departamenti.
2024-yilning avgust oyida ham Qozog‘istonning Oqto‘be shahrida bir erkak yashin urishi oqibatida halok bo‘lgandi. Erkak kechki ovqatdan so‘ng hovliga chiqqan va uni yashin urgan. Tibbiyot xodimlari erkakning hayotini qutqara olmagan.
O‘sha yilning iyul oyida esa Atrov viloyatida 35 yoshli O‘zbekiston fuqarosi yashin urishi oqibatida halok bo‘lgandi. Egasiz uyni yashin urishi natijasida yong‘in kelib chiqqan. Yong‘inni o‘chirish uchun uch kishi va bitta texnikadan iborat o‘t o‘chirish brigadasi jalb qilingan. Keyinchalik uyda odam borligi aniqlangan. Marhum 35 yoshli O‘zbekiston fuqarosi 28-may kuni Qozog‘istonga kelgan va Miyali qishlog‘ida yashovchi fuqaroning uyida vaqtincha ro‘yxatga olingan.
Izoh (0)