Сейлор Мун қаҳрамони ҳатто аниме кўрмаган одамларга ҳам таниш. Аммо ҳар бир образнинг ўз муаллифи бор. Матросча кийган қиз ҳақидаги ҳикояни ким ва қандай ўйлаб топгани ҳақида маълумот берамиз.
Энг машҳур анимеларидан бири “Сейлор Мун” 90 йилларда бутун дунёда намойиш этилган ва жуда катта шуҳрат қозонган.
Сейлор Мунни яратган ижодкорнинг исмини Япониядан ташқарида фақат ашаддий мухлисларгина эслаши мумкин. У нафақат денгизчи кийимидаги қиз ва унинг дўстлари ҳақидаги мангани чизди, балки бу китобларни сериалга ҳам мослади. У ўз асарига ҳаётий тажрибаси, муаммолари ва кечинмаларининг бир қисмини сингдирди. Мана шу япон мактаб ўқувчиси Усаги Цукино ҳақидаги ҳикоянинг бутун дунёга танилишининг сабабларидан бири ана шунда.
Кофулик қиз
Наоко Такеути 1967 йилда Япониянинг Кофу шаҳрида туғилган. Унинг болалиги Японияда иқтисодий юксалиш кучайган даврга тўғри келиб, беташвиш ўтган. Такеути оддий мактабда ўқиган, у ерда астрономия тўгараги ва манга мухлислари клубига ҳам қатнаган. Ўшанда у мангака бўлишга қарор қилган — Японияда комикс чизувчи рассомларни шундай аташади.
Отасининг гапига кириб, у фармацевтликни ўрганган ва ҳатто ярим йил шу соҳада ишлаган. Шунингдек, коллежда ўқиш пайтида синтоистик ибодатхонада хизматчи бўлиб ишлаган, у ерда маросимларни ўтказишда ёрдам берган.
Бироқ Такеути қизиқишини бир дақиқа ҳам унутмаган. У биринчи мангасини мактабнинг юқори синфларида чоп эттирган ва 19 ёшида, фармацевтика коллежини тугатмасдан олдин “Коданся” нашриёти билан ҳамкорлик қилишни бошлаган.
Ижодий йўл излаб
Наоко Такеути бир нечта кичик лойиҳалардан сўнг, Жин Уэбстернинг “Узуноёқ дада” романи асосида ўзининг биринчи йирик мангаси “Мария”ни яратади. Ўша пайтда у бир шифокор билан муносабатда бўлиб, у билан илгари боролмаган қизиқарли жойларга ташриф буюрарди, келин бўлишни орзу қиларди ва буларнинг барчаси унинг асарида ўз аксини топган эди.
Худди шундай, Такеути ҳаётидаги воқеалар унинг кейинги “Cherry Project” мангасининг бир қисмига айланди. Фигурали учишда чўққиларни забт этишга ва севимли йигитининг кўнглини олишга интилаётган ёш фигурачи Черри ҳақидаги ҳикоя 1991 йилдан 1992 йилгача нашр этилган. Бироқ унинг персонажларидан бири кейинчалик “Сейлор Мун”да пайдо бўлади.
Шахсий кечинмалар ва хотираларни манга саҳифаларига кўчириш Наоко Такеути ижодининг ажралмас қисмига айланди. Бундай ёндашув унинг асарларига самимийлик бахш этди.
“Черри лойиҳаси”дан кейин Наоко Такеути келажакдаги асарининг барча асосий хусусиятларини мужассам этган “Кодли исм — Сейлор Ви” мангасини чизади. Бош қаҳрамон Минако Анио исмли мактаб ўқувчиси бўлиб, у ўзида сеҳрли куч борлигини билиб қолади. У Сейлор Ви номли денгиз жангчисига айланиб, Ерни ёвуз кучлардан ҳимоя қилади.
“Кодли исм — Сейлор Ви” 1991 йил бошида нашр этилди ва ўқувчиларга манзур бўлди. Кейинчалик Такеути концепцияни қайта ишлади ва яна тўртта асосий қаҳрамон қўшди. Шундай қилиб, унинг ҳаётидаги энг муҳим лойиҳа — “Сейлор Мун” ғояси туғилди.
Манга 1991 йил декабридан чиқа бошлади ва 1992 йил мартида 200 қисмдан иборат жаҳонга машҳур аниме эфирга узатилди. Ушбу асарда Наоко Такеути барча ҳаётий тажрибаларидан фойдаланди, шунингдек, ўзига яқин бўлган инсонларни манга саҳифаларига кўчирди.
Сейлор Такеути
Рассом қаҳрамони Усаги Цукинога кўплаб шахсий хусусиятларини сингдирганини тан олади. У ҳам худди шундай романтик ва хушчақчақ эди. Мактабда у ҳам шундай форма кийган, университетда эса омад келтиришига ишониб, иккита шарчаси бўлган оданго соч турмагини ясаган. Бундан ташқари, Усагининг ота-онаси ва укасининг исмлари Такеутининг ота-онаси ва укасининг исмлари билан бир хил.
Болаликдаги астрономияга бўлган қизиқиши жангчи қизлар ва бошқа баъзи персонажларнинг исмларини танлашга таъсир кўрсатган. Ўқиш пайтидаги иш тажрибаси Рей Хино образида акс этган, у ҳам ибодатхонада хизмат қилади ва шу боис ёвуз руҳларни ҳис қила олади.
Шунингдек, баъзи қаҳрамонлар исмлар ўрнига қимматбаҳо тошлар номларини олган. Бу Такеутининг заргарлик дўконлари билан машҳур бўлган она шаҳрига ишора қилади. Рассомнинг оиласи ҳам дўконлардан бирига эгалик қилган.
Муваффақият тўлқинида
Манга ва сериал олти йил давомида эфирга узатилди, шу вақт ичида “Жангчи гўзал Сейлор Мун” тўлиқ метражли анимеси ва иккита давоми яратилди. Бироқ кейинчалик Такеутининг нашриёт билан муносабатлари ёмонлашди. Унинг доимий муҳаррири Фумио Осано ишдан кетди. Таҳририят унинг янги лойиҳаси қўлёзмасининг бир қисмини йўқотиб қўйди, натижада экранлаштириш режаси бузилди. Материаллар тўпламини нашр этиш ишлари тўхтаб қолди.
Охир-оқибат Такеути янги “Шуэиша” нашриётига ўтди. У ерда у келажакдаги турмуш ўртоғи, таниқли мангака билан танишди. Улар турмуш қуриб, икки фарзандли бўлишди.
“Коданша”нинг “Сейлор Мун”га бўлган ҳуқуқлари муддати тугагач, Наоко Такеути ўз лойиҳасини такомиллаштириш ва ривожлантиришга киришди. 2003 йилда “Жангчи гўзал Сейлор Мун” ўйин-сериали чиқди, унинг кастинги Японияда катта шов-шувга сабаб бўлди. 2014 йилда эса бутун франшиза қайта ишга туширилди. Дастлаб асл сериалнинг ремейки чиқарилди, 2021 йилда эса “Абадий жангчи гўзал Сейлор Мун” тўлиқ метражли аниме фильми намойиш этилди. 2023 йилда унинг давоми чиқди. Наоко Такеути эса ҳали ҳам янги ғоялари борлигини таъкидламоқда.
Изоҳ (0)