Ghibli студияси Хаяо Миязакининг янги ва сўнгги “Қандай яшаяпсиз?” анимесидан илк кадрларни эълон қилди.
Анимедаги воқеалар Иккинчи жаҳон уруши пайтида бўлиб ўтади ва унда онасининг ўлимини енгишга уринаётган 12 ёшли болакайнинг ҳаёти ҳикоя қилинади.
Миязакининг сўнгги тўлиқ метражли иши бўладиган мултьфильм июль ойи ўрталарида Японияда намойиш этилган ва аллақачон 35 миллион доллардан кўпроқ маблағ тўплашга муваффақ бўлган. Бироқ, студия анъанавий реклама усулларидан воз кечишга қарор қилган. Ghibli студияси битта афишадан ташқари ҳеч қандай реклама материалини чиқармаган.
Анименинг япон каталогларида (брошюралар) чоп этилган кадрлари август ойи бошида ижтимоий тармоқларда пайдо бўла бошлади. Ижтимоий тармоқ фойдаланувчилари кадрларни бир-бирига улашган.
Студия мултьфильмдан олинган кадрларни тақдим этди. Уларда мултьфильмнинг бош қаҳрамони, эпизодик қаҳрамонлар, шунингдек, хаёлий мавжудотларни кўришингиз мумкин.
.jpg)
Миязакининг аввалги “Шамол кучаймоқда” бадиий фильми чиққанига ўн йил бўлди. Режиссёр янги мултьфильм устида 2016 йилда иш бошлаган эди. Маълумки, “Қандай яшаяпсиз?” Ёшино Гензабуронинг шу номли романи асосида яратилди, унинг сюжети, миш-мишларга кўра, сезиларли даражада ўзгарган. Лойиҳа ҳаётнинг маъноси ва инсоннинг дунёдаги ўрни ҳақидаги фалсафий тезислар билан тўлдирилган.
Миязаки — Японияда ҳам, дунёда ҳам оламшумул машҳурликка эришган аниматор. Эҳтимол, режиссёрнинг иши анъанавий япон мотивларини глобал мавзулар билан моҳирона уйғунлаштира олгани учун ҳам нафақат японларга, балки бошқа мамлакатлар томошабинларига ҳам тушунарли ва кўнгилга яқин бўлгандир.
Миязаки студиясида ишлаб чиқарилган биринчи фильм — “Лапута – самовий қалъа” (1986 йил) унга молиявий муваффақият ва томошабинлар муҳаббатини олиб келди.
“Руҳлар олами” (2001) анимеси эса япон киноси тарихидаги энг юқори даромад келтирган фильм бўлди – у деярли 380 миллион доллар йиғди. Бу фильм, шунингдек, BBC талқинига кўра, барча даврларнинг 100 та энг яхши хорижий фильмлари рўйхатига кирган ягона аниме фильм ҳисобланади.
Изоҳ (0)