Қашқадарё вилоятида 2021/2022-ўқув йилида 2 нафар ўқувчи қотиллик жиноятига, 2 нафар ўқитувчи эса қотиллик ва номусга тегиш жиноятига қўлга ургани маълум бўлди. Бу ҳақда кеча, 13 июнь куни вилоят ҳокимлигида бўлиб ўтган ҳокимлик соатида маълум қилинди дея хабар берди ҳокимлик ахборот хизмати.
Маълум бўлишича, вилоятдаги мавжуд мактабларда масъулларнинг эътиборсизлиги боис таълим сифати пасайиши, ўқувчилар давомати ва хулқ-атвори назорат қилинмаслиги юзага келган.
«Оқибатида мактаб ўқувчилари томонидан содир этилган ҳуқуқбузарликлар миқдори ўтган йилнинг мос даврига нисбатан 16 тага яъни 2021 йилда 27 та содир этилган бўлса, 2022 йилда 43 тага етган. Бу мазкур масаладаги кўрсаткич 60 фоизга ошганлигини кўрсатмоқда. Таҳлилларга кўра, жиноятларнинг 2 таси қотиллик бўлиб, бири Қарши шаҳрида, иккинчиси Деҳқонобод туманида содир этилган ва ўлим билан якун топган. Жумладан, Қарши шаҳар 27-сонли ўрта мактабнинг 11-синф ўқувчиси Қарши шаҳар ‘Комилон’ МФЙ Булоқ кўчаси 35-уйда яшаган фуқарони қасддан ўлдириб, ўзининг жиноий қилмишларини яшириш мақсадида, марҳумнинг турмуш ўртоғи ва онасининг ҳам бош қисмига урган, сўнгра унинг Nexia-3 русумли автомашинасини олиб воқеа жойидан яширинган», — деган вилоят ҳокими.
Йиғилишда таъкидланишича, вилоят Халқ таълими бошқармаси томонидан ўқувчилари томонидан жиноят содир этилган мактаб директорлари, маънавий-маърифий ишлар бўйича ўринбосарлари, синф раҳбарлари ёки халқ таълими бўлими мудирларининг шахсий масъулияти ва жавобгарлиги масаласи кўтарилмаяпти.
«Энг ачинарлиси, биз мактаб ўқувчилари орасида ҳуқуқбузарликларнинг олдини олиш ҳақида гапираётган бир вақтда, мактаб ўқитувчилари томонидан жиноят содир этганлигини нима деб изоҳлашимиз мумкин? 2022 йилнинг беш ойида 29 нафар ўқитувчи томонидан жиноятлар содир этилган бўлиб, шундан Шаҳрисабз шаҳрида содир этилгани қотиллик жинояти ҳисобланади», — дейди вилоят ҳокими Муроджон Азимов.
Вилоят раҳбари шунингдек, Қарши шаҳридаги 20-мактабда 2 та ҳолатда ўқитувчилар томонидан ўртача оғир тан жароҳати етказиш билан боғлиқ, 2 та енгил тан жароҳати етказиш билан боғлиқ жиноят содир этилганини айтган.
«Қамаши туманида ўқитувчилар томонидан битта номусга тегиш ва битта безорилик, Чироқчида эса иккита ўғрилик жинояти содир этилган», — дейди вилоят раҳбари.
Изоҳ (0)