Ижтимоий тармоқ саҳифаларида Чилонзор туманидаги мактаблардан бирининг директори ўқитувчини ўқувчилари “Катюша” ва “Смуглянка” қўшиқларини куйламоқчи бўлгани учун ишдан бўшатгани ва мактабда “Хотира ва қадрлаш куни” тадбирлари ўтказилмагани ҳақида хабар тарқалди.
Мазкур ҳолат юзасидан Тошкент шаҳар мактабгача ва мактаб таълими бошқармаси маълумот берди. Унда айтилишича, Чилонзор туманидаги мактаблардан бирида бошланғич таълим фани ўқитувчиси 8 май куни ўзи раҳбарлик қилаётган 4-“Г” синф ўқувчилари билан мактаб маъмуриятини огоҳлантирмасдан, дарс жадвалида биринчи соатда кўрсатилган математика фани дарсини ўтмасдан ўзбошимчалик билан “Хотира ва қадрлаш куни”ни нишонлашга уринган.
Бундан хабар топган мактаб маъмурияти ўқитувчини дарс маҳалида бунақа тадбир ўтказиши мумкин эмаслиги ҳақида яна бир бор огоҳлантирган. Бу каби тадбирлар дарсдан кейин ўтказилиши зарурлигини, агар ўзбошимчалик қиладиган бўлса, ўқитувчи ишдан бўшаш учун ариза ёзиши лозимлигини билдирган.
Бундан ташқари, мазкур таълим муассасасида Хотира ва қадрлаш куни муносабати билан 2025 йил 7 май куни ўқувчилар иштирокида маънавий-маърифий тадбир ўтказилгани таъкидланди.
Бундан аввал Пойтахтда мактаб директори ўқувчининг ота-онаси билан жанжаллашиб, сўкингани ҳақида хабар берилганди. Шунингдек, Қашқадарёдаги мактабда директор ва ўқитувчи аёл соч юлишиб жанжаллашгани хабар қилинганди.
Изоҳ (0)