Angrenda 4 nafar maktab o‘quvchisi bitiruv kechasiga pul topish maqsadida o‘g‘rilik sodir etdi. Bu haqda Toshkent viloyati IIBB matbuot xizmati xabar berdi.
Ma’lum qilinishicha, 16-apreldan 17-aprel kuniga o‘tar kechasi Angren shahri “Nurchi” mahallasida nomaʼlum shaxs Damas’dan pul o‘g‘irlagani haqida hududiy Ichki ishlar bo‘limiga xabar kelib tushgan. Holat o‘rganilib, tegishli tartibda jinoyat ishi qo‘zg‘atilgan.
Olib borilgan tezkor choralar natijasida bu qilmishni 15–17 yoshdagi to‘rt nafar maktab o‘quvchisi sodir etgani aniqlanib, fosh etildi va ular protsessual tartibda ushlandi. Dastlabki tergov davomida gumonlanuvchilar ushbu o‘g‘irlangan pullarni maktab bitiruv kechasi uchun kerak bo‘lgan xarajatlarni qoplash maqsadida olganini bildirgan.
Bu kabi holatlar barchamizni birdek o‘ylantirishi kerak. Chunki bitiruv kechalari va shu kabi tadbirlardagi ortiqcha xarajatlar, “boshqalardan qolmaslik” hissi, moddiy bosim — ayrim o‘quvchilarni jinoyatga boshlamoqda, deydi bosh boshqarma matbuot kotibi Bobur To‘laganov.
IIBB barcha ota-onalarni ogohlikka chaqirib, farzandlar hayot tarzi, maktabdagi holati, kimlar bilan muomalada ekani, internetdagi faoliyati va moliyaviy ehtiyojlariga eʼtiborli bo‘lshga chaqirdi.
O‘g‘rilik uchun jazo
Jinoyat kodeksi 169-moddasiga ko‘ra, o‘g‘rilik, ya’ni o‘zganing mol-mulkini yashirin ravishda talon-toroj qilish — BHMning 50 baravarigacha (18 million 750 ming so‘m) miqdorda jarima yoki 360 soatgacha majburiy jamoat ishlari yoki 2 yilgacha axloq tuzatish ishlari yoki 1 yildan 3 yilgacha ozodlikni cheklash yoxud 3 yilgacha ozodlikdan mahrum qilish bilan jazolanadi.
Bir guruh shaxslar tomonidan oldindan til biriktirib sodir etilgan bo‘lsa, BHMning 300 baravarigacha (112,5 million so‘m) miqdorda jarima yoki 2 yildan 3 yilgacha axloq tuzatish ishlari yoki 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan jazolanadi.
Izoh (0)