Ижтимоий тармоқларда мактаб директори ўқувчиларни барчани олдида калтаклагани ҳақида хабарлар тарқалди. Ҳолат юзасидан Болалар омбудсмани изоҳ берди.
Аниқланишича, 25 февраль куни Навоий вилоятининг Хатирчи туманидаги мактаб директори Қ.Ж (1988 йилда туғилган эркак) 10-синф ўқувчилари Н.Т., А.А. (2008 йилда туғилган, ўғил болалар)ларни гўёки тартибга чақириш важи билан калтаклади.
Директор ўқувчилар танасининг турли қисмларини муштлаб, оёқлари билан тепиб дўппослаган.
Ҳозирда ҳолат юзасидан терговга қадар текширув ҳаракатлари олиб борилмоқда.
Ўқувчиларга етказилган тан жароҳати бўйича судга оид тиббий экспертиза тайинланди.
Мактабдаги жанжаллар
Аввалроқ Сирдарёда ўқитувчи 1-синф ўқувчисини қўлига игна санчиш билан жазолангани ҳақида хабарлар тарқалганди. Суриштирув давомида юқоридаги ҳолат тасдиғини топмаган.
Қашқадарёнинг Шаҳрисабз туманидаги мактабда ўқитувчи 5-синф ўқувчисини уриб жароҳатлади. Қарши шаҳридаги мактабда ўқитувчи ва ўқувчи ёқалашгани тасвирлари тарқалди. Алгебра фани ўқитувчиси ва 10-синф ўқувчиси бўлган икки қиз ўртасида ўзаро келишмовчилик келиб чиқиб, оғзаки тортишиб қолган. Уларнинг хатти-ҳаракатларига чора кўриш учун судга берилган.
Тошкентдаги мактабда аёл дастлабки иш кунида ўқувчини калтаклагани ҳам кенг муҳокамаларга сабаб бўлганди. Аёл жазоланиб, мактаб директори ишдан олинганди.
Танганинг иккинчи томони: ўқитувчига тазйиқ ўтказиш ҳолатлари
2024 йилнинг октябрида Сирдарё туманидаги 2-мактабда икки ўқувчи қиз ўқитувчини урганди. Ўша йилнинг апрелида Фарғонада мактаб ўқитувчиси ўқувчининг қариндошлари томонидан калтакланганди. 2023 йилнинг майида Фарғона вилояти Тошлоқ туманидаги мактабнинг бошланғич синф ўқитувчиси ўқувчисининг онаси томонидан калтакланганди. Сентябрь ойида Сурхондарёда мактаб директори ўқитувчининг яқин қариндошлари томонидан калтакланганди. Мазкур ҳолатлар юзасидан ҳуқуқбузарларга қилмишидан келиб чиққан ҳолда жазо чоралари кўрилган.
Изоҳ (0)