Андижон вилоятининг Қўрғонтепа туманида бир гуруҳ фуқаролар фастфуддан заҳарлангани, ҳолат юзасидан жиноят иши қўзғатилгани ҳақида хабар берилган эди. ССВ матбуот хизмати заҳарланган беморлар саломатлиги ва санитария ҳолати назоратга олинганини маълум қилди.
Маълумотларга кўра, овқатдан заҳарланиш ташхиси билан жами 37 нафар бемор назоратга олинган ва юқумли касалликлар бўлимига даволаниш учун ётқизилган. Улардан 17 нафарида қайт қилиш, ич кетиши, тана ҳарорати кўтарилиши каби касалликнинг клиник белгилари намоён бўлган. Қолган 20 нафарида эса бироз ҳолсизлик ва кўнгил айниши кузатилган ва амбулатор равишда даво муолажаларини олиш учун ҳудудий поликлиника назоратига юборилган.
«Дарё» мухбири ҳодиса сабабларини ўрганиш мақсадида Қўрғонтепада бўлди. Ўрганиш давомида юқумли касалликлар шифохонасининг қабулхонасида турган фуқаролар билан суҳбатлашди. Суҳбатлашганларнинг айтишича, улар айнан хотдог истеъмол қилгандан сўнг саломатлигида ўзгаришлар бўлган.
«Биз бозорда савдо қиламиз. Шунинг учун ҳам ҳар куни кўчада овқатланишга мажбур бўлиб қоламиз. Ўғлим ҳар куни ўша шохобчадан фастфуд буюртма қилади. Кеча ҳам хотдог егандик. Ўша кунни ўзида кўнгли беҳузур бўлиб, ошқозони безовта қилди. Ўзим уйда дори-дармон бердим, анча оёққа туриб қолди. Кеча нисбатан аҳволи оғир эди бугун сал ўзига келди. Шундай бўлса ҳам салбий ҳолатларнинг олдини олиш мақсадида юқумли касалликлар шифохонасига олиб келдим», — дейди шифокор қабулида ўтирган фуқаролардан бири.
«Кеча кундузги соат 12 ларда хотдог егандим. Уни аям бозордан олиб келганди. Айнан қаердан эканлигини билмайман. Кечадан бери уч марта қайт қилдим. Ошқозоним қаттиқ оғрияпти. Шу сабабли онам шифохонага олиб келишга мажбур бўлди. Касаллар кўплиги учун ҳали шифокор қабулига кирмадик, навбатим келишини кутяпман», — дейди яна бир беморлардан бири.
Яна бир бемор Оминахон Ўктамованинг айтишича, уларда ҳам енгил тайёрланадиган овқатлар ейиш оқибатида оилавий заҳарланиш ҳолати кузатилган.
«Кеча ич ўтиш, кўп қайт қилиш билан келгандик. Бу ерга келишимиздан бир кун олдин кечки овқат вақтида хотдог егандик. Эрталаб тўққизларга яқин безовта бўла бошлаганимиздан кейин келиб мурожаат қилдик. Икки кунлик даволанишлар билан анча ўзимизга келиб қолдик. Шифокорлар керакли дориларни қуйишяпти. Ҳолатим кечагидан анча яхши. Кеча ҳаттоки бошимни хам кўтара олмаётган эдим. Лекин дадам билан катта ўғлимда яна озгина касаллик аломатлари бор», — дейди Оминахон Ўктамова.
«Ҳод дог» тайёрлаб сотувчи тадбиркорнинг маълум қилишича, корхонага тегишли шохобчалар уч йилдан буён фаолият юритиб келади. Ушбу давр мобайнида ҳеч қандай салбий ҳолатлар юз бермаган ёки маҳсулотлардан шикоят қилинмаган.
«Оилавий корхонамизга тегишли шохобчалар уч йилдан буён фаолият юритади. Бир кунда ўртача 100 тагача ва ҳаттоки ундан ортиқ фастфуд тайёрланиб, харидорларга тортиқ қилинади. Аввал бундай ҳолатлар юз бермаган. Пандемия пайтида ҳам ‘доставка’ хизмати орқали ишлаганмиз. Лекин ҳозиргидек муаммоларга дуч келмаганмиз. Харидорлардан ҳам шикоятлар келиб тушмаган. Содир бўлган ҳодисада бизнинг шохобча маҳсулотлари гумон қилингач, ‘СЕСъга маҳсулотларимизни текшириб бериш учун алоқа хати юбордик ва уларга намуналар бердик. Бу иш бўйича лаборатория хулосалари уч кундан беш кунга қадар бўлган муддат ичида чиқар экан.
Фуқароларнинг касалланиши айнан бизнинг дўконлар томонидан тайёрланган маҳсулотлар туфайлими ёки йўқми, бу ҳали аниқланмаган. Шунинг учун ҳозирда ўзимни айбдор деб санамаяпман. Балки қисман айб бизда ҳам бўлиши мумкин. Натижа эса чиқадиган хулосаларга боғлиқ. Айни пайтда бизга тегишли бўлган учала фастфуд дўкони ҳам ўз фаолиятини вақтинча тўхтатган», — дейди тадбиркор.
Андижон вилояти юқумли касалликлар шифохонаси бош шифокори Ғофуржон Ибрагимовнинг маълум қилишича, ҳолат бўйича биринчи бемор қайд қилиниши билан хабардор қилинган. Маълумот келиши билан ишчи гуруҳи тузилиб, малакали шифокорларнинг бир гуруҳи билан ҳолатни ўрганиш бошланган.
«Кечаги ҳолат бўйича кундузи соат иккиларда менга шошилинч хабар беришиб, ўткир диарея билан фастфуд еган икки нафар бемор келганини билдиришди. Келиб назорат қилиб беришимни сўрашди. Зудлик билан манзилга етиб келдим. Келганимда икки нафар бемор бор эди. Ундан кейин соат тўртларда касаллар сони тўрт нафарга етди. Тунги соат ўнгача эса жами йигирма етти нафар фуқаро касалланиш бўйича мурожаат қилди. Уларнинг ўн нафарида касаллик белгилари, кўнгил айниши, ич кетиши, бироз ҳолсизлик, қайт қилиш ҳолатлари аниқланди. Барчасига тез тиббий ёрдамлар кўрсатилди. Қилинган дори-дармонлар натижасида уларнинг аҳволи яхшиланди.
Бир нарсани қайд этиш лозим, аксарият беморларимиз ваҳима қилиб ‘биз ҳам фастфуд еганмиз’, деб қўрқиб келишган. Уларда озгина ҳолсизлик, кўнгил айниши бўлган. Лекин кучли касаллик белгилари намоён бўлмагани учун зарур муолажалар, тузли сувлар, бир иккита ҳазм қилувчи ҳамда ошқозон тозаловчи дорилар бердик, ҳолати яхшиланди. Кечадан бери жами 27 нафардан 10 нафар беморда касаллик белгилари намоён бўлган. Яқин орада тахминан касалларнинг етмиш фоизига уйига жавоб берамиз. Бундан ташқари мурожаат қилганларнинг барчаси маълум муддат шифокор назоратига олинади», — дейди шифокор Ғофуржон Ибрагимов.
Қўрғонтепа туман санитария-эпидемиологик осойишталик ва жамоат саломатлиги хизмати бош шифокори Ферузахон Қодированинг айтишича, шахобчаларда тайёрланган маҳсулотлардан олинган намуналар тегишли тартибда лаборатория синовларидан ўтказилиб, беш кун ичида хулосалари эълон қилинади.
«Ҳозирда Қўрғонтепа туман санитария эпидемиологик хизмати ходимлари томонидан синамалар олиб лабораторияга топширилди. Ҳозир улар текширилмоқда. Шунингдек, туманимиздаги тез тайёр бўладиган овқат шохобчалари ҳам назорат қилинмоқда ва аҳолига тушунтириш ишлари олиб борилмоқда. Кунлар иссиқ бўлгани сабабли ҳам ярим тайёр маҳсулотларни истеъмол қилишда эҳтиёт бўлишларини сўраймиз ва огоҳликка чақирамиз. Синама натижалари беш кун ичида тегишли тартибда эълон қилинади», — дейди Ферузахон Қодирова.
Изоҳ (0)