Тиббиёт муассасаларидаги ички дорихоналар фаолияти қайта кўриб чиқилади ва кучайтирилади. Бу ҳақда Соғлиқни сақлаш вазири Амрулло Иноятов Намангандаги матбуот анжумани давомида маълум қилди, дея хабар беради “Дарё” мухбири Азизбек Абдувалиев.
“Дорихоналаримизда ишлаб чиқариш жараёнини йўлга қўйишимиз, тўғрироғи, тиклашимиз керак. Бу бюджет маблағларини тежаш имконини беради. Чунки ҳозир бевосита тиббиёт муассасасида тайёрланиши мумкин бўлган оддий дори-дармонларни ҳам четдан сотиб оляпмиз. Тайёрлашнинг имкони бўлмаган дори-дармонлар эса бевосита ишлаб чиқарувчидан, воситачиларсиз харид қилиниши керак. Шунда касалхоналаримизда беморларнинг дори-дармон билан таъминланиш фоизи ошади, нархлар пасаяди, беморларнинг яқинлари дори-дармон излаб аптекаларга югурмайди”, — деди вазир.
Вазирнинг айтишича, айрим тиббиёт марказларида шифокорлар беморларнинг яқинларига дори-дармонлар рўйхатини тутқазиб, уларнинг маълум бир дорихоналардан харид қилиш ва бу ҳақда муҳр урдириб келишгача тайинлаган. Ушбу марказларнинги раҳбарлари ишдан олинган.
Иноятовга кўра, ҳозирда ушбу йўналишда вазирлик томонидан тегишли буйруқ тайёрланмоқда ва яқин орада унинг ижросига киришилади.
Шунингдек, Амрулло Иноятов беморлар учун кафолатланган тиббий пакетлар борасида ҳам тўхталиб ўтди. Улар 500 дан ортиқ турдаги касалликлар бўйича кўрсатиладиган тиббий хизматларни ўз ичига олади ва оилавий шифокорлик пункти, оила поликлиникаси, кўп тармоқли марказий поликлиника ва марказий шифохоналарга қараб тоифаланади. Анжуманда вилоятда бу бўйича илк тажриба Наманган туманида бошланиши ҳақида айтиб ўтилди.
Изоҳ (0)