Ливия президентлик кенгаши ҳузуридаги Хавфсизлик аппарати раҳбари Абдулғани ал-Кикли ўлдирилгани ҳақидаги хабарлардан сўнг Триполи маркази ва бошқа ҳудудларда қуролли тўқнашувлар юз берди. Бу ҳақда Reuters хабар берди.
Қуролланган гуруҳ шаҳарнинг аҳолиси зич Абусалим туманида жойлашган. Тўқнашувлар иккита энг йирик хавфсизлик кучлари — 444-бригада ва Барқарорликни қўллаб-қувватлаш аппарати (ССА) ўртасида бошланган. Марҳум Абдул Ғани ал-Кикли ССА раҳбари бўлган. У 12 май куни кечқурун 444-бригада штаб-квартираси ҳудудида ўлдирилгани айтилмоқда.
Уни штабга учрашув учун чақиришган, қотилликдан сўнг дарҳол жанговар ҳаракатлар бошланган. Ливия расмийлари комендантлик соати эълон қилган, халқаро аэропортда барча рейслар тўхтатилган. Тўқнашувлар оқибатида камида 6 киши жароҳатланган.
Ички ишлар вазирлиги аҳолини “ўз хавфсизлиги учун” уйда қолишга чақирган. Триполи университети раҳбарияти барча факультетлар, кафедралар ва офисларда ўқув жараёни, имтиҳонлар ва маъмурий ишлар кейинги хабаргача тўхтатилганини эълон қилган.
Пойтахтда фавқулодда ҳолат жорий этилган. БМТнинг Ливиядаги миссияси барча томонларни “зудлик билан жанговар ҳаракатларни тўхтатиш ва тинчликни тиклаш”га чақириб, тинч аҳолини ҳимоя қилиш мажбуриятларини эслатган. Унда “фуқаролар ва объектларга ҳужумлар ҳарбий жиноятларга тенглаштирилиши мумкин”, дейилган.
Абдул Ғани ал-Кикли — ҳарбий қўмондон, 2021 йилда ташкил этилганидан бери ССАни бошқариб келган. Ушбу куч тузилмаси расман ҳукуматга бўйсунса-да, аслида Триполидаги кенг ҳудудларни назорат қилувчи ва катта молиявий ҳамда сиёсий ресурсларга эга бўлган автоном қуролли гуруҳ сифатида фаолият юритган.
Ҳужум ортида нафақат 444-бригада, балки 111-бригада ҳам тургани тахмин қилинмоқда. Иккаласи ҳам Ливия Мудофаа вазирлигига алоқадор.
Изоҳ (0)