Liviya prezidentlik kengashi huzuridagi Xavfsizlik apparati rahbari Abdulg‘ani al-Kikli o‘ldirilgani haqidagi xabarlardan so‘ng Tripoli markazi va boshqa hududlarda qurolli to‘qnashuvlar yuz berdi. Bu haqda Reuters xabar berdi.
Qurollangan guruh shaharning aholisi zich Abusalim tumanida joylashgan. To‘qnashuvlar ikkita eng yirik xavfsizlik kuchlari — 444-brigada va Barqarorlikni qo‘llab-quvvatlash apparati (SSA) o‘rtasida boshlangan. Marhum Abdul G‘ani al-Kikli SSA rahbari bo‘lgan. U 12-may kuni kechqurun 444-brigada shtab-kvartirasi hududida o‘ldirilgani aytilmoqda.
Uni shtabga uchrashuv uchun chaqirishgan, qotillikdan so‘ng darhol jangovar harakatlar boshlangan. Liviya rasmiylari komendantlik soati e’lon qilgan, xalqaro aeroportda barcha reyslar to‘xtatilgan. To‘qnashuvlar oqibatida kamida 6 kishi jarohatlangan.
Ichki ishlar vazirligi aholini “o‘z xavfsizligi uchun” uyda qolishga chaqirgan. Tripoli universiteti rahbariyati barcha fakultetlar, kafedralar va ofislarda o‘quv jarayoni, imtihonlar va ma’muriy ishlar keyingi xabargacha to‘xtatilganini e’lon qilgan.
Poytaxtda favqulodda holat joriy etilgan. BMTning Liviyadagi missiyasi barcha tomonlarni “zudlik bilan jangovar harakatlarni to‘xtatish va tinchlikni tiklash”ga chaqirib, tinch aholini himoya qilish majburiyatlarini eslatgan. Unda “fuqarolar va obyektlarga hujumlar harbiy jinoyatlarga tenglashtirilishi mumkin”, deyilgan.
Abdul G‘ani al-Kikli — harbiy qo‘mondon, 2021-yilda tashkil etilganidan beri SSAni boshqarib kelgan. Ushbu kuch tuzilmasi rasman hukumatga bo‘ysunsa-da, aslida Tripolidagi keng hududlarni nazorat qiluvchi va katta moliyaviy hamda siyosiy resurslarga ega bo‘lgan avtonom qurolli guruh sifatida faoliyat yuritgan.
Hujum ortida nafaqat 444-brigada, balki 111-brigada ham turgani taxmin qilinmoqda. Ikkalasi ham Liviya Mudofaa vazirligiga aloqador.
Izoh (0)