Тошкент шаҳрининг Сергели туманидаги хусусий мактаб ўқувчиси шу мактабда ишловчи тўгарак раҳбари томонидан калтакланган. Бу ҳақда “Дарё”га калтакланган боланинг яқинлари хабар берди.
Маълум бўлишича, воқеа 2025 йилнинг 4 апрель куни содир бўлган.
Ўғлим Абдуллоҳни Сергелидаги “Мударрис” мактабига ўқишга бергандим. 7-синфда ўқийди. Унинг шахмат устози бор экан, тадбир бўлаётган пайтда у ўғлимни урган. Фарзандим тадбир пайтида синфдоши укасининг мазаси қочиб қолганини айтмоқчи бўлиб, унинг олдига борганида ўқитувчи дастлаб боламнинг бошига урган. Кейин воқеа жойида камера борлиги учун уни камерасиз хонага олиб ўтиб калтаклаган. Ўғлим ўқитувчисининг калтаклаши оқибатида ёпиқ бош мия ички жароҳатини олган. Хусусий клиникада ҳам текширтирдим, айнан шунақа жароҳат чиқяпти, дейди воқеа ҳақида гапирган Шерали Маҳмудов.
Мурожаатчининг айтишича, у кеча, 7 апрель куни фарзандини Чилонзор туманидаги республика Шошилинч тез тиббий ёрдам илмий марказига ҳам олиб борган.
16-балницаъда ҳам бош мия ички жароҳати дейишди. Шифокорлар 102 қилишган, ИИБдан ариза олишганди. Аммо натижа йўқ. Шу сабаб кеча, 7 апрель куни Сергели туман прокуратурасига мурожаат қилиб, ИИБ ходимларининг ҳаракатсизлигини айтдим. Шундай бўлса-да, натижа йўқ. Шу боис журналистларга воқеани айтяпман, дейди мурожаатчи.
Шерали Маҳмудов “Мударрис” хусусий мактабига бориб, воқеа содир бўлган пайтда камерага тушган видеони олган.
Мактаб директори шахмат ўқитувчисини ишдан олганини айтганди. Лекин ўқитувчи яна мактабда фаолият юритаётган экан. Директордан нега алдашганини сўраганимда ўзи 8 соат дарси бор эди, шуни ўтиб бериб кетади дейишди, дейди у.
“Мударрис” хусусий мактабининг Сергели филиали директори Замира Сулаймонова “Дарё” журналисти билан суҳбатда воқеа калтакланган ўқувчиси ҳақида эканини билгач, дарсда эканини, кейинроқ ўзи қўнғироқ қилишини билдирди. Такрорий қўнғироққа жавоб бермади. Мактабда академик директор сифатида фаолият юритувчи Соҳибхон Ибрагимовнинг маълумот беришича, воқеадан сўнг шахмат тўгараги раҳбари ишдан олинган. Мактаб директорига ҳайфсан берилган.
Видеони кўрганимда шахмат тўгараги раҳбарининг бола бошига бир марта урганини кўриб, унга мактабда жой йўқлигига амин бўлдим. Тан олиш керак тўгарак раҳбари анча тажрибали, намунали ходимлардан бири эди. Яхши кадрдан айрилиш мактаб учун ҳам ёмон. Бироқ педагогга хос бўлмаган хатоси унинг шу яхши томонларини ҳам ёпиб кетди. Уни ишдан олдик. Мактаб директорига ҳам шундай ҳолатга эътиборсизлик қилгани учун ҳайфсан бердик, дейди мактаб масъули.
“Дарё” воқеалар ривожини кузатишда давом этади.
Изоҳ (0)