Қорақалпоғистон Республикасида дарсдан қочган ўқувчиларни урган ўқитувчи аёл видеосини тарқатмаслик учун 5 минг доллар сўраган шахс қўлга олинди. Бу ҳақда “Бу кун” информацион дастурида маълум қилинди.
Аниқланишича, дарсдан қочиб кетган ўқувчиларни доскага чиқариб, уларга қаттиқ гапирган ва қўл кўтарган ўқитувчи видеоси қарийб бир йил олдин тасвирга олинган.
Ичида ушбу видео сақланиб қолган телефонни сотиб олган шахс тасвирларни тарқатиб юбориш таҳдиди билан ўқитувчига пўписа қилган. Ўқитувчи эса ҳолат бўйича масъул идораларга ариза ёзган.
Ариза асосида олиб борилган тезкор тадбир натижасида фуқаро 3,4 минг долларни олиб, ариза эгасини уйига ташлаб қўйиш мақсадида машинасида олиб кетаётганида ушланган.
Ҳозирда ҳолат юзасидан дастлабки тергов-суриштирув ҳаракатлари олиб борилмоқда.
Аввалроқ Тошкент шаҳридаги мактаблардан бирида ўқувчини калтаклаган ўқитувчи жавобгарликка тортилгани, Самарқандда ўқувчини уриб, унинг қулоқ пардасини йиртиб юборган мактаб директорига жазо тайинлангани тўғрисида хабар берилганди.
Изоҳ (0)