Тошкент шаҳрида 2022/2023-ўқув йили давомида халқаро ва минтақавий фан олимпиадаларида ғолиб бўлган ўқувчилар ва уларнинг устозларини тақдирлаш маросими бўлиб ўтди, дея хабар берди “Дарё” мухбири.
Тадбир Мактабгача ва мактаб таълими вазирлиги томонидан ташкил этилди. Маросимда 65 нафар совриндор ва уларга таълим берган ўқитувчиларга бир марталик пул мукофотлари ва қимматбаҳо совғалар топширилди. Хусусан, нуфузли халқаро олимпиадаларда ғолибликни қўлган киритган ёшларга 165 миллион сўмдан, ўқитувчиларига эса 148 миллион 500 минг сўмдан маблағлар топширилди.
Маросимда нутқ сўзлаган мактабгача ва мактаб таълими вазири Ҳилола Умарованинг айтишича, ўқувчилар бу йил аввалги йилларга қараганда энг кўп медалларни қўлга киритди.
“Жорий ўқув йилида Япония, БАА, Швейцария, Венгрия давлатларида бўлиб ўтган нуфузли халқаро олимпиадаларда 2 та олтин, 1 та кумуш ва 10 та бронза медаллари қўлга киритилиб, ўқувчиларимиз томонидан тарихий ғалабаларга эришилди. Бундан ташқари, йил давомида ўқувчиларимиз турли минтақавий халқаро олимпиадаларда ҳам иштирок этиб, 6 та олтин, 23 та кумуш ва 23 та бронза медалга сазовор бўлди. Бу натижалар ўқувчи ва устозлар саъй-ҳаракатлари билан амалга ошди”, —деди вазир.
Вазирлик бошқарма бошлиғи Умид Раҳмонов “Дарё” мухбири билан суҳбатда совриндорларни тақдирлаш учун ажратиладиган маблағлар миқдори 4 йил ичида 10 баравар ортганини таъкидлади.
“Бу йил ўқувчиларимиз 65 та медални қўлга киритишди. Шундан 8 таси олтин, 24 таси кумуш, 33 таси бронза медалларидир. 2019 йилда ғолибларни рағбатлантириш тизими жорий қилинганда дастлабки ажратилган маблағ миқдори 780 миллион сўм бўлганди. Бугун эса у кўрсаткич 8 миллиард сўмга етди, яъни 10 баробарга кўпайди. Бу мактаб таълимига берилаётган эътибор натижаси”, — деди у.
Маросимда Швейцарияда бўлиб ўтган 55-кимё олимпиадасида олтин медални қўлган киритган Азизбек Назаровга 165 миллион сўм пул мукофоти тантанали топширилди. Унинг айтишича, олимпиадага тайёргарлик жараёни анча оғир кечган.
.jpg)
“Олимпиадага тайёргарлик жараёнида бизга ҳафтада ҳар куни дарс бўларди. Таътилга ҳам чиқмасдик. Ғалабага эришиш учун кунига 10 соатлаб китоб ўқидим. Меҳнатларим натижасини берганидан хурсандман. Олимпиадага ўқитувчиларимиз билан 2 йил тайёрландик. Синовлар назарий ва лаборатория босқичидан иборат бўлди. Биздан 4 киши қатнашдик ва ҳаммамиз медал билан қайтдик. Халқаро олимпиадаларгача минтақавий олимпиадаларда ҳам ғолиб бўлганмиз. Бугун менга берилган 165 миллион сўм пул ўзимга кўплик қилади. Унинг бир қисмини ўқишим учун сарфламоқчиман. Қолганини отамга бераман ва бу менинг ниятларимдан биттаси”, — деди у.
Шунингдек, Азизбек Назаров олий таълимни Ўзбекистонда давом эттирмоқчи эканини айтди.
“Ўзим Қашқадарёликман. Ҳозирда Тошкент шаҳридаги Ибн Сино номидаги ихтисослаштирилган мактабнинг 11-синф битирувчисиман. Келгусида Тошкент тиббиёт академиясида ўқимоқчиман”, — деди олимпиада ғолиби.
Бу йил Азизбекнинг устози, кимё фани ўқитувчиси Моҳира Болтаеванинг 7 нафар ўқувчиси халқаро ҳамда минтақавий олимпиадаларда ғолиб бўлди. Унинг айтишича, инсонда натижага эришиш учун аввало хоҳиш бўлиши даркор.
“Бу йил нуфузли халқаро олимпиадада икки нафар, минтақавий Менделеев олимпиадасида 3 нафар ўқувчим медал олди. Бундан жуда ҳам мамнунман. Ўзим ҳам 2019 йилда халқаро олимпиадада иштирок этиб, кумуш медал олганман. Албатта, олимпиада 10 кунда ўтиб кетади. Лекин унда қатнашиш учун йиллар давомида жуда ҳам зич график асосида тайёргарлик кўрганмиз. Байрамлар, дам олиш кунларида ҳам ишлаганмиз. Энг муҳими, инсонда хоҳиш бўлиши керак. Олимпиада жуда ҳам узоқ йўл. Халқаро майдонни кўрган инсон ҳали кўп нарса билмаслигини англаб етади. Чунки бошқа ёшларнинг билим даражасини кўради. Бундан янада олдинга юришга ўрганади”, — деди муаллим.
Тантанали тадбирда академик Абдулла Аъзам ҳам қатнашди. Олим ёшлар ва устозларга мурожаат қилиб, учинчи ренессансни қуриш вақти келганини айтди.
“Тарихимизда иккита илм-фан юксалиши бўлган. Биринчи ренессанс Ал-Хоразмийдан бошланади, то мўғул истилоси ва Беруний, Ибн Синоларгача. Иккинчиси, темурийлар ва Мирзо Улуғбек даврида. Фарзандларимиз томирида ана шу буюк аждодларимиз қони оқмоқда. Ва биз яна жаҳонга ўзбекнинг интеллектуал салоҳияти ва қудратини кўрсатиб қўйишимиз керак. Ана шу учинчи ренессанс бўлади. Бунинг учун ҳурматли ўқувчилар, мен сизлардан илтимос қиламан, эришган натижангиз билан тўхтаб қолманг. Юксак марраларни кўзланг. Математик бўлсангиз, Филдс медали олишни ният қилинг. Физик, химик, геолог бўлсангиз, Нобел мукофоти олишга ҳаракат қилинг. Қўрқманг. Бунга сизнинг иқтидор ва салоҳиятингиз етади. Фақат мақсаддан чалғимасангиз бўлди. Ҳаётда чалғитадиган нарсалар кўп”, — деди олим.
Вазирлик берган маълумотларга кўра, сўнгги маротаба 5 та халқаро олимпиада жорий йил каби тўлиқ анъанавий шаклда 2019 йилда ўтказилган ва унда ўқувчилар томонидан 8 та медал (2 та кумуш, 6 та бронза) қўлга киритилган.
2021 йилдаги натижа бундан аввалги энг яхши натижа бўлган, бироқ у пайтда пандемия сабабли барча олимпиадалар онлайн шаклда ўтказилиб, ўқувчилар фақат назарий саволларга жавоб берган ҳамда амалий ва тажриба-синов топшириқлари берилмаган. Ўзбекистонлик ўқувчилар 2022 йилда 6 та медал, 2021 йилда 10 та медал қўлга киритган.
Эслатиб ўтамиз, Ўзбекистон президентининг 2019 йил 3 майдаги қарорига мувофиқ:
- олтин медални қўлга киритган ўқувчилар БҲМнинг 500 баравари (165 миллион сўм), устози 450 баравари (148,5 миллион сўм);
- кумуш медал учун — ўқувчи БҲМнинг 300 баравар миқдори (99 миллион сўм), устози 250 баравар (82,5 миллион сўм);
- бронза медал учун — БҲМнинг 200 баравари (66 миллион сўм), устози 150 баравар (49,5 миллион сўм) пул мукофотлари билан тақдирланади.
Бундан ташқари, Халқаро олимпиада ғолиблари ОТМларга имтиёз билан грант асосида ўқишга қабул қилиниб, кейинчалик таълим муассасаларида ўқитувчи бўлиб фаолият юритадиган тақдирда, лавозим маошига 150 фоиз ҳар ойлик устама олади.
Изоҳ (0)