Estoniya harbiy-dengiz kuchlari xalqaro dengiz qonunlarini buzib, Boltiq dengizida bayroqsiz suzayotgan tankerni qo‘lga oldi. U Rossiyaning “soya floti” tarkibiga kiruvchi kemalardan biri deb gumon qilinmoqda. Bu haqda Estoniya bosh vaziri Kristen Mixal ijtimoiy tarmoqdagi sahifasida xabar berdi.
“Bugun ertalab Estoniya dengiz floti hech bir davlat bayrog‘isiz harakatlanayotgan va sanksiyaga tushgan kemani to‘xtatdi. Hozirda tegishli idoralar bortga chiqib, uning huquqiy maqomini va xavfsizlik holatini tekshirmoqda”, deb yozgan siyosatchi.
Kema ilgari Jibutida ro‘yxatdan o‘tkazilgani qayd etilgan bo‘lsa-da, hech bir mamlakat bayrog‘isiz harakatlangan. Bu esa xalqaro qonunlarni buzish hisoblanadi. Kema Tallin ko‘rfazi yaqinida qo‘lga olingan. Amaliyotga vertolyotlar jalb etilgan.
Estoniya ommaviy axborot vositalari xabariga ko‘ra, tanker Rossiyaning Boltiq dengizidagi asosiy neft eksport porti — Ust Lugaga yo‘l olgan edi.
Rossiya Boltiq dengizida yuzlab bayroqsiz, hujjatsiz va shubhali tankerlarni o‘z ichiga olgan “soya floti”ni boshqarishi aytiladi. G‘arb davlatlariga ko‘ra, bu neft-gaz mahsulotlarini sanksiyalarni chetlab o‘tgan holda eksport qilish imkonini beradi.
Estoniya chegara xizmati vakili Veyko Kommusaar voqeaga quyidagicha izoh berdi:
“So‘nggi bir yil ichida Finlyandiya qo‘ltig‘ida hujjatlari yo‘q ko‘plab kemalar paydo bo‘ldi. Aniq aytish mumkinki, bu Rossiya soya flotining bir qismidir”.
G‘arb davlatlari bunday noqonuniy kemalarga qarshi kurashni kuchaytirgan. Hatto ayrim hollarda ularni cho‘ktirish varianti ham muhokama qilinmoqda.
Estoniya parlamenti shu hafta harbiy-dengiz kuchlariga tijorat kemalariga qarshi “harbiy kuch ishlatish” imkonini beruvchi qonunni qabul qildi. Bu chora mamlakatning dengiz tubidagi muhim infratuzilmasiga tahdid soluvchi kemalarga qarshi qaratilgan.
2023-yilning dekabrida Finlyandiya hukumati yana bir bayroqsiz tankerni hibsga olgan edi. U Estoniya va Finlyandiyani bog‘lovchi suvosti elektr liniyasiga zarar yetkazishda gumon qilingan.
Izoh (0)