Amerikalik jurnalist Jeffri Goldberg iPhone algoritmidagi xato tufayli AQSH prezidenti Donald Tramp ma’muriyatining maxfiy Signal chatiga kirib qolgan. Bu haqda Britaniyaning The Guardian gazetasi Oq uyning ichki tergovi natijalariga asoslanib xabar bermoqda.
Nashr ma’lumotlariga ko‘ra, Uolts jurnalistning raqamini adashib qo‘shmoqchi bo‘lgan boshqa odam nomi ostida saqlab qo‘yganidan so‘ng, uni Yamandagi Amerika operatsiyalari muhokamasi uchun Signal’dagi chatga qo‘shgan.
Ta’kidlanishicha, The Atlantic jurnali bosh muharriri Jeffri Goldbergni boshqa shaxsning kontakt kartochkasiga qo‘shishni Uoltsga iPhone taklif qilgan. Qurilma algoritmi Goldbergning telefon raqami bilan hozirda AQSH Milliy xavfsizlik kengashi matbuot kotibi lavozimini egallab turgan Brayan Xyuzning aloqa ma’lumotlari o‘rtasida xato bog‘liqlikni ko‘rgan.
Ma’lum qilinishicha, Jeffri Goldbergning telefon raqami o‘tgan yilning oktyabr oyida AQSH prezidentining milliy xavfsizlik bo‘yicha maslahatchisi Mayk Uoltsga yetib borgan.
Aynan o‘sha paytda Trampning matbuot kotibi Brayan Xyuz Uoltsga jurnalist yozmoqchi bo‘lgan mavzulardan biri bo‘yicha Goldbergning so‘rovini yuborgan. Xyuz Uoltsga yo‘llagan elektron xatida o‘z imzosi yonida Goldbergning raqamini ko‘rsatgan.
“Uolts oxir-oqibat Goldbergga qo‘ng‘iroq qilmagan, biroq g‘alati tasodif tufayli Goldbergning raqamini bilmay turib iPhone’ida saqlab qo‘ygan — hozirda milliy xavfsizlik kengashi matbuot kotibi bo‘lgan Xyuzning kontakt nomi ostida” deya yozadi The Guardian.
Bu “g‘alati tasodif”, chamasi, iPhone algoritmining nomukammalligiga bog‘liq bo‘lgan.
Raqam Uoltsning iPhone’i yordamida “kontakt taklifini yangilash” paytida xatolik tufayli saqlanib qolgan, deya ta’kidlaydi nashr.
Gap iPhone ilgari noma’lum bo‘lgan raqamni smartfon u bilan bog‘liq bo‘lishi mumkin deb hisoblagan mavjud kontaktga biriktirish funksiyasi haqida ketmoqda.
Bu Goldbergning Amerika hukumatining maxfiy guruh chatiga tasodifan kirib qolishiga sabab bo‘lgan — prezident maslahatchisi u yerga MXK kotibini kiritmoqchi bo‘lgan.
24-mart kuni The Atlantic jurnali bosh muharriri Jeffri Goldberg uni adashib Signal messenjeridagi AQSH hukumatining maxfiy chatiga qo‘shib qo‘yishganini ma’lum qildi. Natijada jurnalist AQShning yuqori martabali amaldorlari Yamandagi harbiy operatsiya tafsilotlarini muhokama qilayotganiga guvoh bo‘lgan.
Izoh (0)