АҚШнинг Нью-Йорк шаҳрида БМТ ўрмонлар бўйича форумининг 18-сессияси бўлиб ўтмоқда. Бу ҳақда Табиат ресурслари вазирлиги ахборот хизмати хабар берди.
БМТнинг Иқтисодий ва Ижтимоий Кенгаши (ECОSOS) томонидан ташкил этилган форумда Ўзбекистон салоҳияти Табиат ресурслари вазири Азиз Абдуҳакимов бошчилигидаги делегация томонидан намойиш этилмоқда.
Қайд этилишича, тадбирда БМТнинг 2017—2030 йилларга мўлжалланган ўрмонлар бўйича стратегик режасини амалга ошириш масалалари муҳокама қилинган. Шунингдек, Ўрмонлар бўйича халқаро битим кучга кирганидан кейин 2024 йилда ўрта муддатли баҳолашга тайёргарлик кўрилган.
Форум доирасида Ўзбекистон томони раислигида Жаҳон банки, FAO, БМТ YeIK, Канада ўрмон хизмати ва Чехия ўрмон хўжалиги институти билан ҳамкорликда қўшма тадбир ташкил этилди. Тадбирда БМТга аъзо давлатларнинг 100 дан ортиқ вакиллари, ўрмонларни бошқариш соҳасидаги маъмурий ва илмий доиралар, шунингдек, халқаро нодавлат нотижорат ташкилот раҳбарлари иштирок этган.
Тадбирда нутқ сўзлаган Азиз Абдуҳакимов Ўзбекистонда экология ва атроф-муҳитни муҳофаза қилиш, кенг кўламли ободонлаштириш акцияси, Орол денгизининг қуриган тубида ўрмон барпо этиш борасида амалга оширилаётган ишлар ҳақида маълумот берди. Шунингдек, “Яшил макон” акцияси натижаларига тўхталиб ўтган.
Ўзбекистонда муҳофаза этиладиган табиий ҳудудлар майдони мамлакат ҳудудига нисбатан 2016 йилдаги 4 фоиздан бугунги кунда 14 фоизга кенгайтирилганини алоҳида таъкидлаган. Бундан ташқари, Жаҳон банкининг табиий ресурслар минтақавий департаменти директори П.Агостини Ўзбекистонда ўрмонларни тиклаш бўйича умумий қиймати 142 миллион долларлик лойиҳани тақдим этган.
Якунда тадбир иштирокчилари Самарқанд шаҳрида бўлиб ўтадиган БМТнинг учта йирик тадбири — чўлланиш бўйича глобал тадбир (UNCCD CRIC-21), Ёввойи ҳайвонларнинг кўчиб юрувчи турларини сақлаб қолишга доир Конвенция сининг 14-томонлар конференцияси (CМС COP-14) ва Бутунжаҳон туризм ташкилоти (UNWTO) Бош Ассамблеясининг 25-сессиясига таклиф этилган.
Изоҳ (0)