Korzinka.uz супермаркетлар тармоғи асосчиси Зафар Ҳошимов Самарқандда ўтказилган иқтисодий форум ҳақида ўз фикрларини билдирди.
Кечагина Самарқанд шаҳрида ўз ишини якунлаган II Ўзбекистон Иқтисодий форуми ҳақида қатнашчи сифатида шуни аниқ ва дадил айта оламанки, форум жуда самарали ўтди, — деб ёзади тадбиркор.
Унга кўра, бу каби форумларнинг самараси — мамлакат, минтақа ҳамда умумжаҳон даражада содир бўлаётган жараёнлар, уларнинг иқтисодиётга таъсири, уларни қандай талқин этиш, шу орқали уларга нисбатан қандай таъсир ўтказиш, чора-тадбирлар кўриш ҳақида ғоя ва фикрлар алмашинишдан иборатдир.
Маҳсули эса — баҳс-мунозаралар, муҳокамалар ва музокаралар орқали келажак истиқболларни, долзарб приоритетларни, маслак-мақсадларни ва амалий чора-тадбирларни аниқлаб олиш, англаш ва фикр-ғояларни уйғунлаштириб олишдан иборатдир.
Худди ана шу призма орқали қараганда, бу ўтган форум жуда муваффақиятли бўлди, деб ҳисоблайман, — дейди Зафар Ҳошимов.
Форумда деярли барча халқаро молия ташкилотлари, йирик инвестицион корпорациялар, инфратузилмаларни ривожлантириш корхоналари, халқаро банк ва молия муассасалари, логистика, халқаро иқтисодий ОАВлар, тадқиқот ва академия вакиллари, ҳамда хорижий ва маҳаллий корхоналар вакиллари қатнашди.
Тадбиркорга кўра, бу қатнашчилар ўз даражасида ташкилот ва корхоналарида қабул қилинаётган қарорларга бевосита таъсир қилишга қодир, ваколатли қатнашчилардир. Демак, бу форумнинг хулоса ва натижалари иқтисодий, ижтимоий ҳаётимизга давомий таъсири бўлиши шубҳасиз.
Шахсан менга, тадбиркор сифатида, ушбу форум жуда аҳамиятли ва фойдали бўлди. Унда мен «биринчи қўллардан» олган ҳозирги вазиятга халқаро ташкилотлар ва турли ҳукуматлар мутасаддилардан тортиб чет эл инвесторлари билан форум тадбирлари ҳамда бирга бир суҳбатларда олган ахборот ва ғоялар, корхонамизнинг ҳозирги ва истиқболли стратегиясини ифодалашда жуда катта далда бўлади, — деб ёзади у.
Korzinka.uz супермаркетлар тармоғи асосчиси ўз хулосаларидан баъзиларини санаб ўтди:
- Инфляция келажак бир неча йил мобайнида нафақат мамлакатимиз, балки умумжаҳон даражасида энг долзарб муаммо ва таҳлика бўлади;
- Пандемиядан сўнг ҳали жаҳон иқтисодиёти ўзини тиклаб олмаган даврда Россиянинг Украина билан бошлаган уруши, нафақат бу мамлакатлар, балки бутун дунё иқтисодиётига ўта салбий таъсир кўрсатмоқда;
- Бу шароитда иқтисодиётимиз ўсиш кўрсаткичларини юқори даражада ушлаб туриш янада мураккаб вазифага айланмоқда ва уни ечиш учун мамлакатимизда охирги беш-олти йил олиб борилаётган ислоҳотларни янада жадаллаштириш лозим;
- Мамлакатимиз ўсиш суратларини ушлаб туриш учун чуқурроқ тизимли ўзгаришлар бошлаш: хусусийлаштиришни жадаллаштириш, давлат иқтисодиётни бошқаришидан иложи борича тезроқ четланиши, инфляцияга жавобан давлат харажатларини кескин қисқартириш, халқаро савдони эркинлаштириш — ЖСТга киришни тезлаштириш масалалари туради;
- Юқори инфляция шароитида чет элдан олинадиган кредитлар нархи кескин ўсаётгани сабабли, мамлакатимиз ичида банк ислоҳотларини жадаллаштириш, ва шу аснода ўсишни ички молиявий ресурслар, яъни мамлакатимиз корхоналари ҳамда аҳоли маблағларини ривожланишимизни молиялашга жалб қилиш, ҳамда иқтисодиётимизга чет элдан тўғридан-тўғри инвестицияларни жалб қилиш масаласи туради;
- Логистика ва транспорт тақчиллиги ҳамда анъанавий иқтисодий ҳамкорларимизда рўёбга келаётган қийинчиликларни ҳисобга олган холда экспорт ва импорт бозорларимизни диверсификация қилиш ҳамда янги транспорт коридорлар ва логистик ечимлар излаш долзарб муаммо;
- Иқтисодий ўсишни барқарорлик тамойиллари асосида амалга ошириш яъни атроф муҳит ва экология, ҳуқуқий кафолатлар, ижтимоий масалалар, жумладан, гендер тенглик, ёшлар сиёсати, инклюзивлик, иқтисодиётимизда корпоратив бошқарув андозаларини татбиқ этиш ва ривожлантириш орқали режаларимизни амалга ошириш.
Унга кўра, шу қадамлар орқали, форум ўз шиорида эълон қилган инсон қадри ва инсон манфаатига хизмат қилувчи ислоҳотлар режасига янада чуқурроқ уйғунлик киритишга муваффақ бўлди.
Зафар Ҳошимовнинг ёзишича, яхши хабарлар ҳам талайгина:
Форумнинг нафақат оммавий тадбирларида, балки шахсий яккама якка суҳбат ва учрашувларда кўпгина чет эллик салобатли инвесторлар ва амалдорлар мамлакатда бўлаётган жадал ўзгаришлар, илғор жараёнлар ҳақида ижобий фикрда бўлди.
Гарчи, уларнинг назарида, бир қарашда, ислоҳотлар сурати бир оз секинлашгандай туюлса-да, иқтисодиётда жадал тўғри қадамлар қўйиш давом этса, ҳозирги таҳликали шароитда мамлакат олдида ноёб имкониятлар пайдо бўлаётганини кўп таъкидлади.
Уларнинг айтишича, Ўзбекистон тўғри йўл танлаган ва худди шунинг учун, ҳатто пандемия шароитида ҳам иқтисодини ривожлантира олди.
Минтақадаги қатор қийинчиликлар пайдо бўлаётган бу шароитда ҳам биз яна бир бор ғолиб бўлиб чиқишимизга имкониятлар катта, — деб ёзади тадбиркор.
Муҳими, шу онда Ўзбекистонга дунё иқтисодий ва молиявий доираларининг назари тушган, жадал ривожланиш бўсағасида турган, нотинч минтақада барқарор ривожланиб, дадил қадам босаётган ва дунё молиявий ва иқтисодий доиралари учун алоҳида жозибага эга макон бўлиб шаклланяпти.
Бу имкониятни қўлдан беришга ҳаққимиз йўқ, деб ўйлайман, — деб якунлайди Зафар Ҳошимов.
Изоҳ (0)