Самарқанд шаҳрида 1-октябр куни бошланган Марказий Осиё экофаоллари иштирокидаги экологик форум якунланди. Ёпилиш маросими Самарқанд сайёҳлик марказидаги Самарканд Regency меҳмонхонасида ўтказилиб, унда Ўзбекистон биринчи хоними Зироатхон Мирзиёева ҳамда Шаҳноза Мирзиёева иштирок этди.
Ёпилиш маросимида сўзга чиққан Зироатхон Мирзиёева барча иштирокчиларга раҳмат айтиб, минтақадаги экологик вазиятга барча масъул эканини таъкидлади.
Маросимда асосий урғу кутилганидек экология мавзусига қаратилди. Бадиий қисмда Орол фожиаси ҳақида мулоҳазага ундовчи ажойиб саҳна кўринишига уйғунлашган видеоролик эълон қилинди. Саҳна кўриниши бошида сувга тўлган денгиз тасвирлари, охирида эса денгизнинг қақраган саҳрога айлангани кўрсатилди. Саҳна кўринишини нутқий нуқсони бўлган ёш йигит-қизлар маромига етказиб ижро этишди. Томошабинлар эса уларни махсус жестлар билан қўллаб-қувватлашди.
Журналист, экофаол Никита Макаренко ва Женисбек Пиязов иштирокидаги навбатдаги чиқиш ҳам Орол мавзусига бағишланди. Клипда Орол тўлди ва қўшиқдан сўнг ёш қизалоқ Орол фожиаси ҳақида сўзлаган таъсирли монологида денгиз тўлгани ижодкорларнинг орзуси экани айтилди. “Орол тўладими? Буни сайёрамиз билади”, деб тугатилди монолог.
Кейинчалик Ўзбекистон, Қозоғистон, Қирғизистон, Туркманистон ва Тожикистон ёшлари ўз мамлакатларида иқлим ўзгаришларига қарши кураш доирасида нима ишлар қилинаётганини тақдимот қилиб беришди. Айниқса ўзбекистонлик ва қозоғистонлик ёшларнинг чиқишлари меҳмонларда яхши таассурот қолдирди.
Барча давлат вакиллари чиқишидан аввао Камолиддин Ўринбоев дирижерлигидаги оркест ўша миллатнинг машҳур мусиқаларини чалиб туришди. Экранда эса давлат байроғи ва ўша мамлакатнинг машҳур экоманзиллари кўрсатиб турилди. Шунингдек, минтақа давлатлари миллий қўшиқлари жонли ижрода куйлаб турилди. Масалан, Ўзбекистон экофаоллари тақдимотга чиқишидан аввал оркестр ўзига хос терма мусиқа чалишди.
Экофорум ёпилиш маросимида уч кун давомида гуруҳларга бўлиниб, минтақа эко ҳаётини яхшилаш бўйича ўз ғояларини муҳокама қилган иштирокчилар охирги кунда мартабали меҳмонлар, ЮNISЭФ раҳбарияти вакиллари, экоэкспертлар қаршисида саралаб олинган якуний таклифларини билдиришди.
Иштирокчилар уч кунлик муҳокамалардан кейин қуйидаги таклифларни илгари суришди:
- Давлатлар эколойиҳаларни молиялаштирувчи фонт ташкил қилиши керак;
- Марказий Осиёдаги бизнес экологик талабларга мувофиқ ишлаши шарт;
- Минтақа ёшлари экология бўйича қонунчилик ишлаб чиқишда ва мавжуд қонунларга тузатиш киритишда қатнашиши керак. Уларнинг овозлари инобатга олиниши, экология вазирликлари қошида ёшлар қўмитаси ташкил қилиниши, экоқонунлар ёшлар иштирокисиз чиқарилмаслиги лозим;
- Ёшларга экология мавзусида фикр алмашиш учун платформа керак;
- Ёшларнинг волонтёр экани ўқишга кираётганда инобатга олиниши керак;
- Болалар боғчаларида яшил бурчаклар ташкил этиб, болалар экохабардорлигини ошириш учун бу мавзудаги мультфильмларни кўпайтириш;
Юқори савияда ташкил этилган ёпилиш маросимининг бадиий қисми афсонавий америкалик санъаткор Майкл Жексоннинг Earth Song (Сайёра ноласи) қўшиғи билан якунланди.
Зироат Мирзиёева ҳақида
Ўзбекистоннинг биринчи хоними Зироат Мирзиёева Маҳмудовна 1964 йил 4 декабрда Фарғона вилояти Қўқон шаҳрида туғилган. 1986 йилда Тошкент ирригация ва мелиорация институтини (ҳозирда «Тошкент ирригация ва қишлоқ хўжалигини механизациялаш муҳандислари институти» Миллий тадқиқот университети) муҳандис-иқтисодчи ихтисослиги бўйича тамомлаган.
2020 йилдан буён Ўзбекистонда очиқ ва инклюзив муҳитни яратиш орқали аҳолининг ёрдамга муҳтож қатламларини ижтимоий ҳимоя қилиш, соғлиқни сақлаш ва таълимни ривожлантириш масалалари бўйича қатор хайрия лойиҳаларини амалга ошираётган «Замин» халқаро жамоат фонди Васийлик кенгаши раисидир.
Фонд фаолиятининг устувор йўналиши атроф-муҳитни муҳофаза қилишдан иборат. Кўкаламзорлаштириш, ҳаво сифати мониторингини автоматлаштириш, табиийресурслардан оқилона фойдаланиш, ёшлар орасида экологик таълимни ривожлантириш, олис ҳудудларда тоза ичимлик суви билан таъминлаш каби масалалар бўйича лойиҳалар амалга оширилмоқда.
Зироат Мирзиёева ижтимоий ва экологик соҳалардаги долзарб масалаларга кўпроқ эътибор қаратиш мақсадида ҳам миллий, ҳам халқаро даражада қатор тадбирларни ўтказмоқда.
Изоҳ (0)