Маданият ва санъатни ривожлантириш жамғармаси ижрочи директори Гаяне Умерова 4 майдан 2024 йилнинг 14 январига қадар давом этадиган “Ўзбекистоннинг археологик хазиналари. Македониялик Искандардан то Кушонлар сулоласигача” номли янги кўргазма ҳақида фикрларини билдирди. Бу ҳақда “Дарё” мухбири хабар берди.
Гаяне Умерованинг айтишича, Лувр музейидаги кўргазмага тайёргарлик кўриш жараёнида Берлин музейида ҳам кўргазма очиш хусусида келишиб олинган.
“2019 йилда давлатимиз раҳбарининг Германияга ташрифи чоғида меморандум имзолагандик. 3 йил давомида кўргазма ташкилотчилари билан экспонатларни танлаш масаласида музокаралар олиб бордик. Ўшанда кўргазма Кушон империяси мавзусида бўлиши қарор қилинган эди. Ташкилотчилар асосий эътиборни Қадимги Грециянинг Марказий Осиё ва Кушон империяси билан муносабатларига қаратишди.
Бу Ўзбекистон ва унинг маданиятини халқаро майдонда намойиш этиш учун жуда тўғри концепция. Ҳар икки кўргазма бирин-кетин очилмоқда. Бу кўргазмада Луврдагидан кўра 2 баробар кўпроқ экспонатлар намойиш этилмоқда. Кўргазма экспозицияси учун 1200 квадрат метр майдон ажратилган бўлиб, экпспонатларимиз Ўзбекистоннинг 6 та музейидан олиб келинган ноёб буюмлар, Кушон империясига оид бўлган 85 та экспонат билан бирга жамоатчиликка тақдим этилмоқда. Биз турган жой Берлин маркази саналади. Жеймс-Саймон Галереяси ва Бергамо ҳаммаси бир жойда жойлашган бўлиб, бу ерда 3 та музей бор. Биз тақдим этаётган экспонатлар Ўзбекистон тарихи ва маданиятига бўлган қизиқиш ортишига сабаб бўлади деган умиддамиз. Бу ерда ўша давр харитасини ҳам кўриш мумкин.
Биз давлатимиз раҳбари билан халқаро майдонда иккинчи марта шундай катта кўргазмани очяпмиз ва бу билан фахрланамиз. Бу эса дунё ҳамжамиятида маданий-дипломатик алоқаларни янада мустаҳкамлаш нияти эканлигини кўрсатмоқда”, — дейди у.
Изоҳ (0)