Ўзбекистоннинг УНЕСCО ишлари бўйича Миллий комиссияси бош котиби этиб Гаяне Умерова тайинланди. Бу ҳақда Туризмни ривожлантириш давлат қўмитаси матбуот хизмати хабар берди.
Миллий комиссия фаолиятининг асосий вазифаси Ўзбекистоннинг UNESCO ва ICESCO фаолиятидаги халқаро нуфузи ва ўрнини мустаҳкамлаш, вазирлик ва идораларнинг маданият, таълим, илм-фан, коммуникациялар ва ахборот ишлаб чиқаришга доир фаолиятини мувофиқлаштиришдир. Комиссия раиси бош вазир ўринбосари — Азиз Абдуҳакимов.
Гаяне Умерова 2008—2017 йилларда Ўзбекистон тасвирий санъат галереясининг Кўргазмалар ва жамғармалар бўлимида етакчи мутахассис бўлиб ишлаган. 2017 йилдан бошлаб Маданият вазирлиги ҳузуридаги Санъат ва маданиятни ривожлантириш жамғармасининг молия бошқаруви бўлими бошлиғи, 2020 йилдан ушбу жамғарманинг ижрочи директори лавозимида ишлаб келган.
У 2008 йилда Тошкент шаҳридаги Халқаро Вестминстер университети (бакалавр), 2012 йилда эса Sotheby’s Санъат институти ва Манчестер университети (магистратура)ни тугаллаган. Sotheby’s Аукцион уйида, Victoria&Albert музейи (Буюк Британия)да ҳамда Жорж Помпиду маркази (Франция)да малака оширган. Ўзбек, инглиз ва рус тилларини билади.
Гаяне Умерова Ўзбекистон Президенти ва ҳукумат топшириғи билан санъат соҳасидаги йирик халқаро лойиҳаларни амалга ошириш учун масъул ҳисобланади. 2022 йилда Лувр музейида бўлиб ўтадиган Ўзбекистон маданий мероси кўргазмасини ташкил қилиш, Ўзбекистон Давлат санъат музейи реконструкцияси, Ўзбекистоннинг замонавий Реставрация марказини яратиш, 2022 йилда ўтказиладиган ШҲТ саммити муносабати билан Самарқандда Буюк Ипак йўли музейининг очилиши, 2022 йилда Берлинда Ўзбекистон кўргазмасининг очилиши, Самарқанд халқаро хайрия яриммарафонининг ўтказилиши шулар жумласидандир.
Изоҳ (0)