Маданият ва санъатни ривожлантириш жамғармаси 14-19 июнь кунлари Швейцариянинг Базел шаҳрида ўтказилаётган ўн олтинчи Design Miami/Basel кўргазмасида иштирок этмоқда. Бу ҳақда жамғарма ахборот хизмати «Дарё»га маълум қилди.
Таъкидланишича, Маданият ва санъатни ривожлантириш жамғармаси кўргазмада Тошкент шаҳридаги Замонавий санъат марказини реновация қилиш бўйича янги концепция билан қатнашмоқда. Мазкур концепция Studio K.O. француз архитектура бюроси билан ҳамкорликда ишлаб чиқилган. Ушбу архитектура бюросининг штаб-квартираси Париж ва Марокашда жойлашган. Жамғарма махсус лойиҳалар доирасида ташриф буюрувчиларга ғиштдан қурилган ва дизель электр станцияси сифатида ишлатилиб, Тошкентдаги илк трамвай линиясини электр токи билан таъминлаган 1912 йилги бинонинг Studio K.O. томонидан ишлаб чиқилган меъморий концепциясини намойиш этади.
Маданият ва санъатни ривожлантириш жамғармаси кенгаши раиси ўринбосари Саида Мирзиёеванинг таъкидлашича, замонавий санъат маркази Ўзбекистон маданий инфратузилмасининг асосий элементларидан биридир.
«Кўплаб халқаро лойиҳалар ва миллий меросга ҳурмат билан ёндашган ҳолда қизиқарли концепциялар ишлаб чиқиш тажрибасига эга етакчи архитектура студияси билан ҳамкорлик қилишдан мамнунмиз. Биргаликда маданият муҳити, Тошкентнинг ижодкор ҳамжамиятини гуллаб-яшнаш имконини берувчи кўплаб ташаббусларимизни амалга ошириш учун макон яратамиз. Замонавий санъат маркази дунёнинг маданий харитасидаги энг муҳим нуқта, бутун дунёдан иштирокчилар ва меҳмонлар учун очиқ бўлган халқаро ҳамкорлик платформаси бўлади», — дейди Саида Мирзиёева.
Маданият ва санъатни ривожлантириш жамғармаси ижрочи директори Гаяне Умерованинг қайд этишича, замонавий санъат маркази жамғарма ташаббуси билан ташкил этилган.
«Марказ илк бор 2019 йилда очилган ва Тошкент маданий ҳаётининг диққатга сазовор марказига айланди. Бу ерда пойтахтнинг маданий ҳаётини шакллантирадиган кўргазмалар, маърузалар, очиқ суҳбатлар ва таклиф этилган рассомлар билан учрашувлар ўтказилади. Марказда бўлиб ўтган тадбирларда Франция, Италия, Германия, Буюк Британия, Норвегия, Сингапур, АҚШ, Россия ва Ўзбекистондан режиссёрлар, рассомлар, кураторлар, музей ходимлари, меъморлар, маданият муассасалари раҳбарлари фаол қатнашган.
Шунингдек, марказ Москвадаги «Гараж» замонавий санъат музейи, Aga Khan Trust for Culture ва Aga Khan Music Initiative маданият жамғармаси, Париждаги «Pompidu» санъат ва маданият маркази, Сингапурдаги замонавий санъат маркази ва Британиянинг Tate Modern галереяси билан узоқ муддатли ҳамкорлик лойиҳаларини амалга оширади.
Жамғарма томонидан Тошкент шаҳрининг бир қанча маҳаллаларида ҳам санъат масканлари, яъни арт-резиденциялар барпо этиш режалаштирилган. Рассомлик, ҳайкалтарошлик, кулолчилик, тўқимачилик, кино, 3D каби турли фан ва йўналишлар билан ишлаш бўйича семинарлар ташкил этилади. Таълим дастури доирасида марказнинг асосий биносида ижодкорларнинг малакасини ошириш бўйича махсус дастурлар ишга туширилади. Марказ Ўзбекистонда экологик ва инновацион маданий муҳитни яратишга ёрдам беради», — дейди Гаяне Умерова.
Маълум қилинишича, Design Miami/Basel – 30 дан зиёд халқаро галереялар ва дизайнерларни бирлаштирган етакчи дизайн кўргазмаси ҳисобланади. У одамларни ғайриоддий коллекция дизайнлари, архитектура лойиҳалари ва оммавий муҳокамалар орқали бирлаштиради.
Изоҳ (0)