Ўзбекистон 2022 йилда илк бор Венеция замонавий санъат биенналесида иштирок этмоқда. Бу ҳақда Маданият ва санъатни ривожлантириш жамғармаси ахборот хизмати «Дарё»га маълум қилди.
Таъкидланишича, Венециядаги 59-Халқаро замонавий санъат биенналеси доирасида Маданият ва санъатни ривожлантириш жамғармаси Space Caviar архитектура-тадқиқот студияси ва куратори Шеида Гомаши томонидан яратилган «Дихит Алгоризми – билимлар боғи» лойиҳасини тақдим этяпти.
«Ўзбекистон павильони олим ва мутафаккир Муҳаммад ибн Мусо ал-Хоразмийнинг ижодини акс эттиради. Павильонда технологияга оид турли нуқтаи назарлар тақдим этилади ва бу ҳодисанинг хилма-хиллиги, чуқурлиги ва мураккаблиги кенг жамоатчилик дастури иштирокчилари томонидан муҳокама қилинади», — дейилади жамғарма хабарида.
Маданият ва санъатни ривожлантириш жамғармаси кенгаш раиси ўринбосари Саида Мирзиёеванинг таъкидлашича, Ўзбекистон Венеция биенналесида иккинчи бор иштирок этмоқда.
Бу сафар буюк олим Муҳаммад ибн Мусо ал-Хоразмий меросидан илҳомланган ҳолда «Дихит Алгоризми – The Garden оf Knowledge» лойиҳасини тақдим этмоқдамиз. Бу йилги павильонимиз «Билимлар боғи»га айланди. Унда ўзбекистонлик рассомлар, куратор ва санъатшунослар бошқа юртлардан келган ҳамкасблари билан учрашиб, янги ғояларни муҳокама қилиб, тажриба алмашади.Бутун кўргазма давомида павильонимизда ўзбек ва халқаро мутахассислар иштирокидаги бой оммавий маданий дастур тақдим этилади. Дастурнинг биринчи қисмида Ўзбекистондан 14 нафар ижодкор қатнашади. Номоддий мерос кўргазмаси, оламга фалсафий назар, одамзоднинг ўй-хаёлини қамраб олган мулоҳазалар... Буларни кўришнинг имкони йўқ, аммо ҳис қилиш мумкин.
Ғоя ва мақсадларимиз ижод аҳли қалбидан жой эгаллашига умид қилган ҳолда, меҳмонларга хуш келибсиз, деймиз, — деди Саида Мирзиёева.
Маданият ва санъатни ривожлантириш жамғармаси ижрочи директори Гаяне Умерова куратор Сесилия Алеманий томонидан танланган мавзу жамғарманинг ғоялари ва замонавий санъат соҳасидаги жорий йўналишига мос келишидан жуда мамнунлигини қайд этди.
«Чунки биз фаолиятимизнинг барча жабҳаларида фанлараро ёндашувни тарғиб қилишга интиламиз. Кўргазманинг бутун даври давомида павильонда илмий-оммабоп ва юқори ихтисослаштирилган тадбирларнинг бой дастури бўлиб ўтади.
Павильон майдонида бутун дунёдан таниқли рассомлар, кураторлар ва замонавий санъат назариётчилари, шунингдек, Ўзбекистондан ёш рассомлар ва кураторлар йиғилади. Дастур доирасида суҳбатлар, чиқишлар ва анъанавий ўзбек шеърияти танлови ўтказилади», — дейди Гаяне Умерова.
Қайд этилишича, кўргазма 23 апрелдан 27 ноябрга қадар давом этади.
Изоҳ (0)