Bevaqt so‘ngan yulduzlar: hayotdan erta ko‘z yumgan Bollivud aktrisalari

Bollivud — porloq yulduzlar, hayajonli filmlar va ajoyib ijrolar dunyosi. Ammo ayrim iste’dodli aktrisalar shon-shuhrat cho‘qqisiga chiqqan paytida hayotdan ko‘z yumgan, ba’zilari esa taqdirning og‘ir zarbalariga dosh berolmay oramizni tark etgan. Ularning qisqa umr yo‘li, unutilmas rollari va sirli vafoti hanuzgacha ko‘pchilikni hayratga solib keladi. Ushbu maqolada Bollivud kino sanoatining eng yorqin, ammo bevaqt hayotdan ko‘z yumgan aktrisalari haqida hikoya qilamiz.

Divya Bharati — 19 yosh

1993-yil 5-aprelda Bollivud o‘zining eng istiqbolli aktrisalaridan birini — 19 yoshli Divya Bharatini yo‘qotdi. U kino sanoatining navbatdagi superyulduzi sifatida e’tirof etilgan bo‘lib, juda qisqa faoliyati davomida bir qator muvaffaqiyatli filmlarda rol o‘ynashga ulgurgan edi. Uning eng mashhur filmlari orasida “Rosa va olov”, “Telba sevgi”, “Uch g‘azabga to‘lgan erkak 2” kabi kartinalar bor edi.

Atigi 18 yoshida Divya taniqli prodyuser Sajid Nadiadvalaga turmushga chiqdi. Ammo bu baxt uzoqqa cho‘zilmadi: aktrisa o‘z kvartirasining derazasidan noma’lum sabablarga ko‘ra qulab tushdi va vafot etdi. Uning vafotidan keyin ko‘plab mish-mishlar paydo bo‘ldi: ayrimlar buni tasodifiy baxtsiz hodisa desa, boshqalar buni jinoyat yoki hatto o‘z joniga qasd qilish ehtimoli bilan bog‘laydi. Lekin haligacha bu sir ochilmagan va aktrisaning o‘limi Hindiston kinosining eng jumboqli fojialaridan biri bo‘lib qolmoqda.

Bugungi kunda ham Divya Bharatining nomi Bollivud tarixida unutilmas nomlardan biri sifatida tilga olinadi. U yaratgan obrazlar, ijro etgan rollari va yorqin qiyofasi hanuzgacha muxlislar yodidan o‘chmagan.

Smita Patil — 31 yosh

Smita Patil Bollivudning eng sevimli aktrisalaridan biri edi. U o‘zining iste’dodi va san’atga bo‘lgan cheksiz muhabbati bilan tanilgan bo‘lib, milliy mukofot sovrindori, tomoshabinlar va tanqidchilarning ardog‘idagi aktrisa sifatida e’tirof etilgan. Biroq uning shaxsiy hayoti doimo bahs-munozaralarga sabab bo‘lgan.

Smita turmush o‘rtog‘i bo‘lgan aktyor Raj Babbar bilan uchrashgach, ularning munosabatlari jamoatchilik e’tiborini tortdi. Raj Babbar allaqachon turmush qurgan bo‘lsa-da, Smita unga ikkinchi rafiqa bo‘lib turmushga chiqdi va bu qaror jamiyatda katta shov-shuvga sabab bo‘ldi, so‘ng juftlik farzandli bo‘lishdi. Oilada Pratik Babbar tug‘ildi. Ammo bunday baxt uzoqqa cho‘zilmadi: Smita Patil farzandi dunyoga kelganidan atigi ikki hafta o‘tib, tug‘ruqdan keyingi asoratlar sabab vafot etdi. O‘shanda aktrisa atigi 31 yosh edi.

Smita Patil Bollivudning tijoriy filmlaridan ko‘ra chuqur mazmunli va ijtimoiy mavzularga asoslangan filmlarida ko‘proq rol o‘ynagan. U hind jamiyatidagi ayollar mavqeini yuksaltirish, ularning huquqlari va muammolarini yoritishga harakat qilgan. Shuningdek, Smita Patil faqatgina aktrisa emas, balki faol ayol huquqlari himoyachisi ham bo‘lgan. U intervyularida ko‘p marotaba Hindiston ayollarining hayoti, gender tengligi va ijtimoiy adolatsizlik mavzularida o‘z fikrlarini bildirishdan tortinmagan.

Gita Bali — 35 yosh

Gita Bali ham Hindistonning yorqin kino yulduzlaridan biri bo‘lib, hayotdan juda erta ko‘z yumgan. U nafaqat muvaffaqiyatli aktrisa, balki sadoqatli rafiqa va mehribon ona sifatida ham tanilgan. Uning turmush o‘rtog‘i mashhur aktyor Shammi Kapur edi.

Aktrisaning hayoti kutilmaganda 1965-yilda chechak kasalligi sababli yakun topdi. Atigi 35 yoshida olamdan o‘tgan Gita Bali Bollivud sahnasida yorqin iz qoldirib, o‘zining iste’dodi va go‘zalligi bilan muxlislar qalbidan chuqur joy olgan edi.

Gita Bali o‘zining sho‘xligi, tabiiy jozibasi va aktyorlik mahorati bilan tomoshabinlarni rom etgan aktrisa edi. 1950-yillarda u Hindiston kinosida o‘z o‘rniga ega bo‘lib, o‘sha davrning yetakchi aktrisalaridan biri sifatida nom qozongan.

Madhubala — 36 yosh

Madhubala 1933-yil 14-fevralda dunyoga kelgan. Tug‘ilgan paytidayoq shifokorlar uning yurak tug‘ma nuqsoni borligini va uzoq yashay olmasligini aytishgan. Biroq u taqdir sinovlariga qaramay, o‘sib ulg‘aydi va Hindiston kino tarixidagi eng go‘zal hamda iqtidorli aktrisalardan biriga aylandi. Madhubala 1969-yil 23-fevralda, bor-yo‘g‘i 36 yoshida hayotdan ko‘z yumdi. U qisqa umrida o‘zidan buyuk meros qoldirdi, ayniqsa, “Buyuk Mo‘g‘ul” filmidagi Anarkali roli uning nomini abadiy mashhur qildi.

Aktrisaning shaxsiy hayoti ham ko‘pchilikning e’tiborida bo‘lgan. Madhubala va Dilip Kumar o‘rtasidagi sevgi hikoyasi Bollivud tarixidagi eng mashhur muhabbat qissalaridan biri hisoblanadi. Ammo taqdir ularni birlashtirmadi va Madhubala keyinchalik Kishor Kumar bilan turmush qurdi. Biroq sog‘lig‘idagi muammolar tufayli oxirgi yillarini to‘shakka mixlanib o‘tkazdi. Yurak xastaligi sabab u kinodan uzoqlashishga majbur bo‘ldi. 1969-yilda, 36 yoshida, Hindiston kinosining Mona Lizasi deb nomlangan bu go‘zal aktrisa olamdan o‘tdi.