Тошкент шаҳар ҳокими ўринбосари Шароф Раҳмонов ва Франция ташқи савдо ва хориждаги фуқаролар бўйича вазир-делегат Лоран Сен Мартен Тошкент трамвай тизимини амалга ошириш бўйича “йўл харитаси”ни имзолади.
Бу ҳақда 12 март куни Франция Ташқи ишлар вазирлигида бўлиб ўтган вазирлик-идоралараро ҳужжатларни имзолаш маросимида қатнашган журналист Азиза Қурбонова хабар берди.
Тошкентда трамвай ҳаракати
2016 йил 2 май куни Тошкентда ҳаракатланаётган сўнгги трамвай йўналиши — “Бешқайрағоч” даҳаси ва Ипподром ўртасида қатновчи 17-йўналиш ёпилган ва шу тариқа Тошкент трамвайининг 115 йиллик тарихига нуқта қўйилганди.
2022 йилнинг январь охирларида тележурналист Хайрулла Нуриддинов “Ўзбекистон 24” телеканалида эфирга узатилган “Менимча” кўрсатувида Тошкентга трамвай қатновини қайтариш тарафдори эканини билдирганди.
Шавкат Мирзиёев ўша йилнинг февралида Самарқанд вилоятига ташрифи давомида фуқаролар мурожаати сабаб трамвайни Тошкентга қайтаришни айтиб ўтганди.
“Трамвайни Тошкентга ҳам қайтармоқчимиз. Фуқаролардан бу борада кўплаб хатлар ва мурожаатлар келяпти”, деган эди президент.
2022 йил февралида Тошкент шаҳар ҳокими ўринбосари Бахтиёр Раҳмонов пойтахт ҳокимлигида бўлиб ўтган матбуот анжуманида Навоий кўчасида трамвай бўлмаслигини айтган эди. Транспорт бошқарма бошлиғи Анвар Жўраев эса трамвай бўйича таклифлар борлигини билдирган.
2022 йил ноябрида Тошкентда трамвай тизимини француз компанияси лойиҳалаштириши маълум қилинди. Шавкат Мирзиёевнинг ушбу мамлакатга ташрифи чоғида Ўзбекистон Транспорт вазирлиги ҳамда Франция Ташқи савдо, иқтисодий жозибадорлик ва хориждаги фуқаролар бўйича вазирлик ўртасида Тошкент трамвай тизими лойиҳаси бўйича келишув имзоланди.
Ҳужжатни бош вазир ўринбосари, инвестициялар ва ташқи савдо вазири Жамшид Хўжаев ҳамда унинг франциялик ҳамкасби Оливье Бешт имзолади. Унга кўра, Тошкентда трамвай линияларини Франциянинг Алстом машинасозлик компанияси қуради. Лойиҳанинг қиймати 167,4 миллион еврога баҳоланди.
Тошкент шаҳри ҳокими ўринбосари, Шароф Раҳмонов Ўзбекистон сўнгги 3–4 ой давомида Алстом билан ҳамкорликда ушбу лойиҳа устида иш олиб бораётганини айтганди.
“Раҳбариятимиз томонидан мазкур лойиҳани амалга оширишни жадаллаштириш бўйича кўрсатма берилди. Ҳозир француз ҳамкасбларимиз билан биргаликда техник-иқтисодий асослаш (техник-иқтисодий асослаш) ва лойиҳанинг ўзини тайёрлаш бўйича ишларни бошладик”, деган эди у.
2024 йил январида Тошкент транспорт тизимига ғилдиракли трамвайлар интеграциялашуви таклиф этилди.
2024 йил март ойида транспорт вазири Илҳом Маҳкамов трамвай орқали биринчи навбатда “эски” Тошкент билан Янги Тошкент боғланиши, шунингдек, пойтахт ичида трамвайни қайси йўналишларга қўйиш масаласи устида ишланаётганини айтди.
“Дарё” Тошкентга трамвай қайтарилиши ҳақида пойтахтда яшовчилар фикри билан ҳам қизиқиб, сўровнома ўтказганди. Аксарият кишилар буни ёқлаган.
Изоҳ (0)