Рақобат қўмитаси Тошкентда реклама қонунчилигини бузган 30 дан ортиқ корхона жаримага тортилганини маълум қилди.
Қонун бузилиш ҳолатлари қўмитанинг Тошкент шаҳар ҳудудий бошқармаси томонидан 2025 йилнинг январь ва февраль ойлари давомида реклама тўғрисидаги қонунчилик талабларига мувофиқлиги юзасидан ўрганиш ва мониторинг ишлари олиб борилганда аниқланган.
Олиб борилган ўрганиш натижаларига мувофиқ, ҳудудий бошқарма махсус комиссияси томонидан Тошкент шаҳрида фаолият кўрсатаётган 30 дан ортиқ хўжалик юритувчи субъектларга, жумладан:
- “Coca-Cola ичимлиги Ўзбекистон Ltd” МЧЖ ХК,
- “International Beverages Ташкент” МЧЖ ХК (Pepsi),
- “Мак Food Сервис” МЧЖ (Evos),
- “Лумиэри” МЧЖ,
- “Туран Медиа” МЧЖ,
- “Оқтепа Food Service” МЧЖ (Оқтепа лаваш),
- “Баратрум” МЧЖ (Сафиа)
га нисбатан “Реклама тўғрисида”ги қонун ҳамда Вазирлар Маҳкамасининг “Ташқи реклама бозорини тартибга солиш тўғрисида”ги 104-сонли қарори билан тасдиқланган низомда белгиланган ташқи реклама ва ахборотни жойлаштириш тартиби бузилиши юзасидан ишлар қўзғатилиб, молиявий жарималар қўллаш ҳақида қарорлар қабул қилинган.
Шунингдек, қонунбузилиш ҳолатини бартараф этиш ва келгусида йўл қўймаслик бўйича бажарилиши мажбурий бўлган кўрсатмалар берилган.
2024 йилнинг августида Рақобатни ривожлантириш ва истеъмолчилар ҳуқуқларини ҳимоя қилиш қўмитаси реклама қонунчилиги юзасидан барча давлат ва нодавлат телеканалларга кўрсатма хати юборганди. Ўша йилнинг декабрида Texnomart “энг зўр таклиф” рекламаси учун жаримага тортилганди.
Изоҳ (0)