Коронавирусга қайта чалиниш эҳтимоли ва антитаначалар таҳлили борасидаги саволларга аниқлик киритилди

Санитария-эпидемиология назорати инспекцияси бош инспектори Нурмат Отабеков коронавирусга қайта чалиниш эҳтимоли борасидаги саволга аниқлик киритди. Бу ҳақда у Республика махсус комиссиясининг карантин чораларини кучайтириш борасидаги қарори юзасидан ўтказилган брифингда маълум қилган.

Мутахассис томонидан вирусли касалликлар, айниқса, респиратор касалликлар билан оғриган одамларда ҳосил бўлган иммун тизими орттирилган иммунитет ҳисобига ушбу касаллик билан қайта касалланишга йўл қўймаслиги қайд этилди. Бироқ одамда респиратор клиник белгиларни чақириши мумкин бўлган жуда кўп вируслар борлиги ҳам қўшимча қилинди.

«Коронавируснинг яна 6 та варианти мавжуд. Яна ўша касаллик билан қайта касалланди, деган фикр, менинг назаримда тўғри эмас. Бу ерда одам ўша касалликнинг ўзгарган ёки қўшимча хислатларини ўзида намоён қилган мутацияга учраган штаммлари билан касалланиши мумкин», — дейди Отабеков.

Шу билан бирга, одамда бирламчи касалланишдан ҳосил бўлган иммунитет тизими жуда саёз бўлса ҳам иккинчи марта намоён бўлган касаллик белгилари бирмунча енгил кечиши организм хотирасида антитаначалар ишлаб чиқарилиши билан боғлиқлиги қайд этилди. Бунда беморда касалликдан тезда халос бўлиш имконияти пайдо бўлади.

Антитаначалар борасида Соғлиқни сақлаш вазирлиги ҳузуридаги Коронавирусга қарши кураш штаби аъзоси, профессор Ҳабибулла Оқилов ҳам ўз фикрларини баён қилган.

Жумладан, Оқилов коронавирусга ҳосил бўлган антитаначаларни аниқлаш методикалари Ўзбекистонга энди олиб келинаётганини билдирган. ИФА ёки ундан ҳам янги ИХЛА таҳлиллари касаллик ўтиб бўлганидан кейин организмда ҳосил бўлган антитаначаларни аниқлаши айтилди. Бу орқали коронавирусни юқтириб, иммунитети кучли бўлгани сабабли касалликни ўзи билмаган ҳолда симптомсиз ўтказган одамлар аниқланади.

«ИФА услубида 3 хил антитаначани аниқлаш мумкин. Улардан Иммуноглобулин Г касаллик ўтиб бўлган одамларда чиқади. Одатда ушбу антитана касалликдан кейин 10 кун ўтиб пайдо бўлади. Иммуноглобулин М касалликнинг айнан фаол ривожланган даврида пайдо бўлади. Шунинг учун биз ИХЛА таҳлилини олдик, унинг ичида иккиси ҳам бор. Бундай тузалган одамларнинг сони қанча кўп бўлса, республика бўйича гуруҳ иммунитети кўрсаткичлари баланд бўлади. Улар беҳавотир юрса ҳам бўлади, энг камида 2-3 ой ҳеч нима юқмайди», — дейди мутахассис.

ИФА таҳлили яқин вақт ичида йўлга қўйилиши хабар қилинди. Махсус комиссия қарорида давлат тиббиёт муассасаларидан ташқари хусусий муассасаларга ҳам ПЗР ва ИФА таҳлилларини ўтказиш учун рухсат берилган.