Хитой аҳолиси йилнинг исталган фаслида илиқ ва иссиқ сув ичишга одатланган. Бу анъана мамлакатда кўп асрлар давомида шаклланган бўлиб, бугунги кунга қадар ўзининг аҳамиятини йўқотмаган. Узоқ умр кўриш борасидаги кўрсаткичлар, гўзаллик ва мустаҳкам саломатлик ушбу усулнинг ҳақиқатан фойдали эканлигини англатади. Диетолог-нутрициолог Инна Коненко доимий иссиқ сув ичиш тиббиётда нечоғлик тўғри ва фойдали одат эканлиги ҳақида маълумот берди.
Нима учун ҳар куни етарли миқдорда сув ичиш муҳим?
Инсон танасининг 60 фоиз қисми сувдан иборатлиги барчамизга маълум. Лимфа системаси эса 98 фоиз сувдан ташкил топган. Агар унга керагича сув етиб бормаса, организмдан токсинлар чиқиб кетиши қийинлашади ва танада турли зарарли моддалар тўплана бошлайди. Қон 98 фоиз сувдан, мускуллар 75 фоиз, суяклар эса 25 фоиз сувдан иборат. Демак, тананинг мутлақо барча тизимлари сувдан иборат. Шунинг учун сув мувозанатини сақлаш ва етарли миқдорда тоза сув ичиш соғлиқ учун муҳимдир. Вояга етган инсоннинг кундалик сув ичиш ҳажми ўрта ҳисобда 2-3 литрни ташкил қилади. Кўрсаткич бўй, вазн, умумий саломатлик ва бошқа кўрсаткичларга қараб ўзгариши мумкин.
Нима учун айнан илиқ ёки иссиқ сув ичиш керак?
Иссиқ сув метаболизмни тезлаштиради ва ошқозон ости бези ширасининг ишлаб чиқарилишини фаоллаштиради. Иссиқ сув умуман олганда бутун танани уйғотади, танадан токсинлар ва зарарли моддаларни чиқариб ташлашга ёрдам беради. Бу эса барча орган функцияларининг узоқроқ ишлашига, ёш ва соғлом бўлишга асос бўлади.
Хитойда кўпчилик ўткир респиратор инфекциялар негизида совуқ қотиш ва сувнинг етишмаслиги билан боғлиқ, деб ишонади. Шунинг учун шамоллаш аломатлари кўринганда дарҳол оддий иссиқ сув ичиш орқали касалликни даволай бошлайди.
Сувни илиқ тарзда ичиш ҳақиқатан ҳам нафас олиш тизимига ижобий таъсир кўрсатади: иситма сабабли организмдан парланиб кетаётган сув ўрни босилади ҳамда балғам тезроқ кўчади. Натижада танадаги сув мувозанати нормал ҳолатга келади.
Иссиқ сувнинг яна бир фойдали хусусияти — у чарчоқ ва стрессдан тезда халос бўлишга кўмак беради. Иссиқ ванна қабул қилиш ташвиш ва уйқусизлик билан курашишга ёрдам беради. Чунки иссиқлик таъсирида қон томирлари кенгаяди, босим бир оз ошади ва мияга кўпроқ кислород етиб боради. Шунингдек, илиқ сув иммун тизимини мустаҳкамлашга ёрдам беради, организмнинг касалликлар ва вирусларга қарши чидамлилигини оширади.
Иссиқ сувни тўғри ичиш қоидалари
Тонгни бир стакан илиқ сув билан бошланг. Унинг ҳарорати ўртача 40-60 даража иссиқ бўлиши лозим. Агар танангиз тез-тез шишлар пайдо бўлишга мойил бўлса, ундай ҳолда соат 19:00 дан кейин сув ичишни тўхтатинг. Сувнинг асосий миқдорини куннинг биринчи ярмида ичиш керак.
Изоҳ (0)